نوجوانوں کو ڈیجیٹل معیشت سے آگاہ کرانا وقت کی ضرورت ہے،حنین ضیاء

کراچی (این این آئی) سوشل انٹرپرینیور، ڈیجیٹل مارکیٹر اور ای کامرس ماہر حنین ضیاء نے کہا ہے کہ ای کامرس پاکستان کی معیشت کو مضبوط بنانے میں اہم کردار ادا کرسکتا ہے اورنوجوانوں کو جدید ڈیجیٹل معیشت سے آگاہ کرنا وقت کی اہم ضرورت ہے۔انہوں نے کہا کہ جس طرح دنیا بھر میں کاروبار اور تجارتی سرگرمیاں تیزی سے ڈیجیٹل پلیٹ فارمز کی طرف منتقل ہورہی ہیں، پاکستان کے نوجوانوں کے لیے بھی اس شعبے میں آگے بڑھنے کے وسیع مواقع موجود ہیں۔ اگرحکومت نوجوانوں کو ای کامرس کی ترقی کے لیے سہولیات فراہم کرے اور ٹیکس میں ریلیف دے تو یہ نہ صرف نوجوانوں کو بااختیار بنائے گا بلکہ ملکی معیشت کو بھی بہتر بنائے گا۔حنین ضیاء نے کہا کہ ڈیجیٹل پلیٹ فارمز کے ذریعے پاکستانی مصنوعات کو دنیا بھر میں متعارف کرایا جاسکتا ہے اور برآمدات کے نئے دروازے کھل سکتے ہیں۔ نوجوان پاکستان کا سب سے قیمتی سرمایہ ہیں اور انہیں جدید ٹیکنالوجی و ڈیجیٹل معیشت کے رجحانات سے آگاہ کرنا وقت کی سب سے بڑی ضرورت ہے۔ اگر نوجوانوں کو تربیت اور حکومتی سرپرستی حاصل ہو تو وہ اپنے کاروبار قائم کرکے نہ صرف اپنی معاشی حالت بہتر کرسکتے ہیں بلکہ ملک کو بھی ترقی کی راہ پر رواں کرسکتے ہیں۔انہوں نے زور دیا کہ دنیا تیزی سے ڈیجیٹل دور میں داخل ہوچکی ہے اور پاکستان کو بھی اس دوڑ میں شامل ہونے کے لیے فوری اقدامات اٹھانے ہوں گے، بصورت دیگر ہم عالمی سطح پر پیچھے رہ جائیں گے۔