واشنگٹن: امریکی صدر ڈونلڈ ٹرمپ نے دعویٰ کیا ہے کہ اس وقت کسی کو معلوم نہیں کہ ایران کی حکومت اور ملک کا انتظام کون چلا رہا ہے۔
خبر رساں ادارے رائٹرز کے مطابق ڈونلڈ ٹرمپ نے ایران کی موجودہ قیادت کے بارے میں بات کرتے ہوئے کہا کہ ان کے لیے سب سے بڑا مسئلہ یہ ہے کہ ایران کو اس وقت کون چلا رہا ہے، اس بارے میں کوئی واضح معلومات موجود نہیں۔
ٹرمپ نے کہا کہ ایران کی دوسری صف کی قیادت بھی ختم ہوچکی ہے اور ان کے لیے سب سے بڑا مسئلہ یہ ہے کہ کسی کو معلوم نہیں کہ ملک کی قیادت اس وقت کس کے ہاتھ میں ہے۔
امریکی صدر کا یہ بیان ایسے وقت سامنے آیا ہے جب ایران اور امریکا کے درمیان جاری شدید کشیدگی کے دوران ایرانی قیادت اور فیصلہ سازی کے نظام سے متعلق سوالات اٹھ رہے ہیں۔
ٹرمپ کے بیان میں یہ واضح نہیں کیا گیا کہ وہ ایران کی ’دوسری صف کی قیادت‘ سے کن افراد کی طرف اشارہ کر رہے تھے۔ اسی طرح انہوں نے یہ بھی تفصیل نہیں بتائی کہ ان کے مطابق ایران میں موجودہ حکومتی معاملات کون چلا رہا ہے۔
ایران کی قیادت سے متعلق امریکی صدر کا یہ بیان خطے میں جاری فوجی اور سیاسی کشیدگی کے تناظر میں سامنے آیا ہے، جس میں دونوں ممالک کے درمیان مستقبل کے اقدامات اور مذاکرات کے امکانات بھی اہم موضوع بنے ہوئے ہیں۔
