رکن اسمبلی حاجی علی مدد جتک کے فنڈز سے سریاب مل کالونی اور کلی حسین آباد میں ترقیاتی کام جاری

کوئٹہ(این این آئی)صوبائی اسمبلی کے رکن اور پیپلز پارٹی کے رہنما حاجی علی مدد جتک کی جانب سے اپنے ایم پی اے فنڈز سے سریاب مل کالونی اور کلی حسین آباد میں مختلف ترقیاتی منصوبوں پر کام زور و شور سے جاری ہے۔ ان منصوبوں میں سڑکوں کی تعمیر، نکاسی آب کے نظام کی بہتری، گلیوں کی پختگی اور عوامی سہولیات کی فراہمی کے دیگر اقدامات شامل ہیں۔اس موقع پر حاجی علی مدد جتک نے کہا کہ عوامی نمائندوں پر یہ فرض عائد ہوتا ہے کہ وہ اپنے حلقے کے عوام کے مسائل حل کرنے کے لیے ہر ممکن اقدامات کریں۔ انہوں نے کہا کہ ایم پی اے فنڈ عوام کی امانت ہیں اور انہیں نیک نیتی کے ساتھ عوام کی فلاح و بہبود پر خرچ کیا جا رہا ہے تاکہ علاقے کے عوام کو بنیادی سہولیات ان کی دہلیز پر میسر ہوں۔انہوں نے مزید کہا کہ ترقیاتی کاموں کی بروقت تکمیل کے بعد علاقے کے لوگوں کو ریلیف ملے گا اور یہ منصوبے معیار اور شفافیت کی بنیاد پر مکمل کیے جا رہے ہیں۔ مقامی عوام نے ترقیاتی اقدامات پر خوشی اور اطمینان کا اظہار کرتے ہوئے حاجی علی مدد جتک کا شکریہ ادا کیا اور توقع ظاہر کی کہ آئندہ بھی علاقے کے مسائل کے حل اور ترقی کے لیے اسی جذبے سے اقدامات جاری رہیں گے۔