اوتھل میں پی ایم ٹی کی عدم تنصیب سے پانی کا شدید بحران، عوام پریشان

لسبیلہ( بیوروچیف)ایس ایس پی لسبیلہ کے دفتر کے قریب واقع پی ایچ ای کے واٹر بور میں پی ایم ٹی (پاور مین ٹرانسفارمر) کی عدم تنصیب نے اوتھل کے شہریوں کو شدید مشکلات سے دوچار کر دیا ہے۔ پی ایم ٹی نہ ہونے کی وجہ سے لاکھا گوٹھ، جاموٹ کالونی، الیاس محلہ، اور رونجہ کالونی جیسے گنجان آباد علاقوں میں پانی کا شدید بحران پیدا ہو چکا ہے۔علاقہ مکینوں کے مطابق پی ایچ ای کی جانب سے لگایا گیا سولر سسٹم ان بستیوں تک پانی کی فراہمی کے لیے ناکافی ثابت ہو رہا ہے۔ پانی آتا بھی ہے تو نلکوں میں محض چند قطرے گرتے ہیں اور فوراً بند ہو جاتے ہیں، جس کی وجہ سے خواتین، بزرگ اور بچے پانی کے لیے در در کی ٹھوکریں کھانے پر مجبور ہیں۔شہریوں کا کہنا ہے کہ پانی جیسی بنیادی سہولت کا نہ ہونا ضلعی انتظامیہ کی نااہلی کا منہ بولتا ثبوت ہے۔ عوامی حلقوں نے وفاقی وزیر تجارت نواب جام کمال خان عالیانی، سیکریٹری سیاحت و ثقافت میر زرین خان مگسی اور متعلقہ حکام سے فوری مطالبہ کیا ہے کہ ایس ایس پی آفس والے پی ایچ ای کے واٹر بور میں جلد از جلد پی ایم ٹی نصب کیا جائے تاکہ پانی کی فراہمی کو ممکن بنایا جا سکے اور عوام کو درپیش مشکلات کا خاتمہ ہو۔