صوبائی حکومت لیویز کو پولیس میں ضم کرنے کے فیصلے پر نظر ثانی کریں،رکن قومی اسمبلی سردار یعقوب ناصر

لورالائی(این این آئی)مسلم لیگ (ن)کے مرکزی رہنما رکن قومی اسمبلی سردار یعقوب ناصر نے وزیر اعلی میر سرفراز بگٹی اور صوبائی حکومت سے مطالبہ کیا ہے کہ لیویز کو پولیس میں ضم کرنے کے فیصلے پر نظر ثانی کریں صوبے میں لیویز فورس کو پولیس میں ضم کرنے کے حکومتی اقدام سے فورس اور عوام میں تشویش پیدا ہوئی ہے انہوں نے کہا کہ انضمام سے صوبے کے قبائلی روایات عوامی جزبات کو ٹھیس پہنچی ہے اور اعتماد و امن و امان کو تباہ کرنے کی چال قرار دیتا ہوں انہوں نے کہا کہ لیویز فورس بلوچستان کی تاریخ قبائلی اقدار اور سماجی ڈھانچے کا حصہ ہے۔ یہ صرف ایک فورس نہیں بلکہ عوامی نمائندگی اور مقامی اعتماد کی علامت ہے۔ لیویز اہلکار چونکہ مقامی قبائل اور بستیوں سے تعلق رکھتے ہیں اس لیے عوام ان پر زیادہ اعتماد کرتے ہیں۔ ان کی مقامی روایات اور رواج سے آگاہی کی وجہ سے چھوٹے تنازعات اور مسائل جلدی حل ہو جاتے ہیں۔