فیفا انڈر 15 ورلڈ کپ اینڈ فیسٹیول 2026 کا شیڈول جاری کردیا گیا۔

فیفا نے آذربائیجان میں ہونے والے انڈر 15 ورلڈ کپ اینڈ فیسٹیول کے میچ شیڈول کی تصدیق کردی۔ پاکستان کو گروپ اے ڈی میں قبرص، گیمبیا، اردن، نائجیریا اور جنوبی سوڈان کے ساتھ رکھا گیا ہے اور پاکستان انڈر 15 ٹیم کو ابتدائی مرحلے میں پانچ میچز کھیلنے ہیں۔

پاکستان اپنا پہلا میچ 24 اکتوبر کو گیمبیا کے خلاف کھیلے گا، یہ میچ پاکستانی وقت کے مطابق سہ پہر 3 بج کر 30 منٹ پر ہوگا جبکہ پاکستان 25 اکتوبر کو جنوبی سوڈان اور قبرص کے خلاف دو میچز کھیلے گا۔

پاکستان 26 اکتوبر کو بھی دو میچز کھیلے گا، پہلے اردن اور پھر نائجیریا کا سامنا کرے گا۔

پاکستان ٹیم تین روز کے دوران مجموعی طور پر پانچ گروپ میچز کھیلے گی۔

ابتدائی گروپ مرحلے کے نتائج کی بنیاد پر ٹیموں کو دوسرے مرحلے کے لیے مختلف ٹائرز میں تقسیم کیا جائے گا اور دوسرے مرحلے میں ٹیموں کو کارکردگی کی بنیاد پر چھ ٹائرز میں تقسیم کیا جائے گا۔

ہر ٹیم دوسرے مرحلے میں مزید چار سے پانچ میچز کھیلے گی، تمام ٹیمیں ایونٹ کے آخری میچ ڈے تک مقابلوں میں شریک رہیں گی اور ہر ٹائر کی فاتح ٹیم کو چیمپئن قرار دیا جائے گا۔

ٹائر اے میں پہلی پوزیشن حاصل کرنے والی ٹیم فیفا انڈر 15 ورلڈ کپ اینڈ فیسٹیول چیمپئن بنے گی۔