کوئٹہ: سنگداس پولیس چیک پوسٹ پر مبینہ بھتہ وصولی کی شکایات، میر عبدالرحیم جتک کا تحقیقات اور ذمہ دار اہلکاروں کے خلاف کارروائی کا مطالبہ

کوئٹہ (رپورٹر)بلوچستان نیشنل پارٹی کے مرکزی رہنما اور معروف قبائلی شخصیت میر عبدالرحیم جتک نے قلات کے علاقے سنگداس پولیس چیک پوسٹ پر مبینہ بھتہ وصولی کے تسلسل پر شدید تشویش کا اظہار کرتے ہوئے کہا ہے کہ چیک پوسٹ پر آنے جانے والے مسافروں، ٹرانسپورٹرز اور چھوٹی گاڑیوں کے مالکان سے مبینہ طور پر زبردستی رقم وصول کرنے کی شکایات انتہائی قابل تشویش ہیں۔ اس عمل سے نہ صرف عوام کو شدید مشکلات کا سامنا ہے بلکہ بلوچستان کی اہم شاہراہوں پر سفر کرنے والے شہریوں میں بھی بے چینی پائی جاتی ہے۔ انہوں نے کہا کہ وزیراعلیٰ بلوچستان میر سرفراز بگٹی کی جانب سے صوبے بھر میں بھتہ وصولی کے خاتمے اور عوام کو ریلیف فراہم کرنے کے واضح احکامات جاری کیے گئے ہیں، لیکن اس کے باوجود سنگداس پولیس چیک پوسٹ پر مبینہ طور پر بھتہ وصولی کی شکایات سامنے آنا حکومتی احکامات پر عملدرآمد کے حوالے سے کئی سوالات کو جنم دیتا ہے۔ اگر کسی چیک پوسٹ پر سرکاری احکامات کے برخلاف عوام سے رقم وصول کی جا رہی ہے تو اس کا فوری نوٹس لیا جانا چاہیے۔ میر عبدالرحیم جتک نے وزیراعلیٰ بلوچستان، وزیر داخلہ، آئی جی پولیس بلوچستان اور متعلقہ اعلیٰ حکام سے مطالبہ کیا کہ سنگداس پولیس چیک پوسٹ پر مبینہ بھتہ وصولی کی شکایات کی غیر جانبدارانہ تحقیقات کرائی جائیں، ذمہ دار اہلکاروں کا تعین کرکے قانونی کارروائی عمل میں لائی جائے اور عوام، مسافروں اور ٹرانسپورٹرز کو بلاجواز تنگ کرنے کا سلسلہ فوری بند کیا جائے۔ انہوں نے کہا کہ عوام کو تحفظ، سہولت اور عزت کے ساتھ سفر کی فراہمی حکومت اور متعلقہ اداروں کی بنیادی ذمہ داری ہے۔