کوئٹہ شہر اور گرد و نواح میں جاری گیس کی شدید لوڈشیڈنگ اور گیس کمپنی کی مجرمانہ غفلت قابل مذمت ہے،پشتونخوانیشنل عوامی پارٹی

کوئٹہ (این این آئی) پشتونخوا نیشنل عوامی پارٹی کے صوبائی پریس ریلیز میں کہا گیا ہے کہ کوئٹہ شہر اور گرد و نواح میں جاری گیس کی شدید لوڈشیڈنگ اور گیس کمپنی کی مجرمانہ غفلت کی سخت ترین الفاظ میں مذمت کی جاتی ہے۔ بیان میں کہا گیا ہے کہ گیس کمپنی کی یہ روش نہایت افسوسناک اور ناقابلِ قبول ہے کہ گرمی کے موسم میں بھی عوام کو گیس جیسی بنیادی سہولت سے محروم رکھا جا رہا ہے۔رات 10 بجے کے بعد کوئٹہ شہر میں گیس کی مکمل بندش نے شہریوں کی زندگی اجیرن بنا دی ہے۔ یہ نہ صرف عوام کے صبر کا امتحان ہے بلکہ انہیں ایک بنیادی ضرورتِ زندگی سے محروم کیا جا رہا ہے۔ ہزاروں کی تعداد میں خواتین خانہ، بزرگ شہری، بیمار افراد اور بچے روزمرہ کی بنیادی ضروریات پوری نہ ہونے کے باعث شدید مشکلات کا شکار ہیں۔ نہ کھانا تیار کیا جا سکتا ہے، نہ ہی گھریلو کام ممکن ہو پاتے ہیں۔اس سنگین صورتحال پر عوامی سطح پر شدید غم و غصہ بڑھ رہا ہے، جبکہ حکومتی اداروں پر عوام کا اعتماد بھی متزلزل ہو چکا ہے۔ گیس کمپنی کے حکام کو عوامی شکایات کے ساتھ ساتھ معزز عدلیہ کے واضح احکامات بھی موصول ہو چکے ہیں، مگر اس کے باوجود تاحال کسی قسم کا عملی، مؤثر اور مستقل حل فراہم نہیں کیا گیا، جو کہ ادارے کی مجرمانہ غفلت، نااہلی اور غیر ذمہ داری کا واضح ثبوت ہے۔پشتونخوا نیشنل عوامی پارٹی مطالبہ کرتی ہے کہ کوئٹہ شہر اور مضافات میں گیس کی بلاتعطل فراہمی فوری طور پر یقینی بنائی جائے، اور گیس کی بندش میں ملوث ذمہ دار افسران کے خلاف قانونی کارروائی کی جائے۔ عوامی مشکلات کے ازالے کے لیے ہنگامی بنیادوں پر گیس لوڈشیڈنگ کے مکمل خاتمے کے لیے عملی اقدامات کیے جائیں۔پریس ریلیز میں مزید کہا گیا ہے کہ اگر ان مطالبات کو فوری طور پر پورا نہ کیا گیا تو پشتونخوا نیشنل عوامی پارٹی پرامن احتجاج، دھرنوں اور قانونی چارہ جوئی کا مکمل حق محفوظ رکھتی ہے، اور بھرپور عوامی حمایت کے ساتھ احتجاجی تحریک شروع کی جائے گی۔ یہ مسئلہ صرف کوئٹہ کے عوام کا نہیں بلکہ پورے نظام کی ناکامی کا عکاس ہے۔ ہم واضح کرتے ہیں کہ عوامی حقوق پر کسی قسم کا سمجھوتہ نہیں کیا جائے گا۔