ملک سے فرسودہ نظام حکومت کا خاتمہ ناگزیر ہے، نظام کی تبدیلی کے بغیر عام عوام کو حقوق نہیں مل سکتے،کامرایڈ امداد قاضی کا تقریب سے خطاب

کوئٹہ (این این آئی) کمیونسٹ پارٹی آف پاکستان کے مرکزی سیکریٹری جنرل کامریڈ امداد قاضی نے کہا ہے کہ ملک سے فرسودہ نظام حکومت کا خاتمہ ناگزیر ہے، نظام کی تبدیلی کے بغیر عام عوام کو حقوق نہیں مل سکتے، سرمایہ دار، جاگیردار، ملا اور ملٹری گٹھ جوڑ نے ملک کی چاروں اکائیوں میں تفریق ڈال دی، ان خیالات کا اظہار انہوں نے کوئٹہ پریس کلب میں کمیونسٹ پارٹی بلوچستان کمیٹی اور بلوچستان بزگر کمیٹی کے زیراہتمام منعقدہ شہید نذیر عباسی کی 45 ویں برسی کی تقریب سے خطاب کرتے ہوئے کیا، کامریڈ امداد قاضی نے ہم ملک مخالف نہیں ریاستی فرسودہ نظام کے خلاف ہیں، ہم ایسی ریاست کی تشکیل چاہتے ہیں جس میں تمام قوموں کو یکساں حقوق میسر ہوں، وسائل پر انکا حق حاکمیت ہو، عام شہری کا معیار زندگی بلند ہو، آج بلوچستان سلگ رہا ہے، سندھ ناراض ہے، پنجاب سے ناانصافی کی آوازیں بلند ہو رہی ہیں، کامریڈ قاضی نے کہا کہ امریکہ چین کی سرد جنگ میں پاکستان کی پالیسی تباہ کن ثابت ہوگی، ہمیں شہید نذیر عباسی کے مشن کو لیکر آگے بڑھنا ہے اور ملک میں سوشلسٹ انقلاب کا قیام لانا ہے، تقریب سے سندھ ھاری کمیٹی کے صدر کامریڈ منور تالپور، کمیونسٹ پارٹی بلوچستان کمیٹی کے سیکریٹری کامریڈ پروفیسر نیک محمد کاکڑ، بلوچستان بزگر کمیٹی کے صدر کامریڈ فرحاد رند، جنرل سیکریٹری غلام محمد جمالی، کامریڈ اقبال، حمیدہ نور و دیگر نے خطاب میں کہا کہ شہید نزیر عباسی نے ضیائی مارشل لاء کے خلاف عملی جدوجہد کرتے ہوئے ثابت کیا ہے کہ قوموں کے حقوق غصب کرنے والے ملک و قوم کے وفادار نہیں ہوسکتے، استحصالی قوتوں کے خلاف متحد و منظم جدوجہد کرنے کی ضرورت ہے۔