محکمہ جنگلات،لائیو سٹاک اراضی کے فوری تصفیے اور انتقال کا عمل شروع کیا جائے،کمشنر کوئٹہ

کوئٹہ(این این آئی)کمشنر کوئٹہ ڈویژن شاہزیب خان کاکڑ کی زیر صدارت کوئٹہ ڈویژن میں محکمہ لائیو اسٹاک اور جنگلات کی اراضی کی تفصیلات اور الاٹمنٹ کے حوالے سے اہم اجلاس منعقد ہوا۔ اجلاس میں ڈپٹی کمشنر کوئٹہ کیپٹن (ر) مہر اللہ بادینی، اسسٹنٹ کمشنر کوئٹہ ڈویژن سید کلیم اللہ، ڈائریکٹر آئی ٹی محب آغا کے علاوہ ڈپٹی کمشنر چمن، ڈپٹی کمشنر قلعہ عبداللہ اور ڈپٹی کمشنر پشین نے آن لائن شرکت کی۔اجلاس میں کوئٹہ ڈویژن میں محکمہ جنگلات اور لائیواسٹاک کی اراضی، الاٹمنٹ، اسٹلمنٹ اور دیگر امور کا تفصیلی جائزہ لیا گیا۔ اس موقع پر انڈر سیٹلمنٹ اور سیٹلمنٹ اراضیوں سے متعلق مسائل پر بھی غور کیا گیا اور ان کے حل کے لیے اقدامات تجویز کیے گئے۔اس موقع پر ڈپٹی کمشنرز کی جانب سے محکمہ لائیو اسٹاک اور جنگلات کی اراضی کی الائنمنٹ سمیت تمام تفصیلات سے آگاہ کئے۔ کمشنر کوئٹہ ڈویژن نے ہدایت کی کہ دونوں محکمے کی اراضی کی مکمل اور تازہ تفصیلات جلد از جلد پیش کریں تاکہ انڈر سیٹلمنٹ اور سیٹلمنٹ اراضیوں کے مسائل حل کیے جا سکیں۔انہوں نے مزید کہا کہ محکمہ جنگلات اور لائیو اسٹاک کی اراضی کے فوری تصفیے اور انتقال کا عمل شروع کیا جائے تاکہ واضح ہو سکے کہ کوئٹہ ڈویژن میں ان محکموں میں کتنی اراضی الاٹ ہو چکی ہے یا قابضین کے زیر استعمال ہے۔ اس حوالے سے تفصیلی رپورٹ اگلے اجلاس میں پیش کرنے کی ہدایت بھی کی گئی۔