باجوڑ،دہشتگردوں کی فائرنگ سے شہید ایلیٹ فورس کے اہلکار کی نماز جنازہ ادا

باجوڑ(این این آئی)باجوڑ میں دہشت گردوں کی فائرنگ سے ایلیٹ فورس کا اہلکار شہید ہوگیا،جس کی نماز جنازہ پولیس لائن میں ادا کی گئی۔ تحصیل لوئی ماموند کے تھانہ لغڑئی پر دہشت گردوں نے سنائپر سے فائرنگ کرکے ڈیوٹی پر تعینات ایلیٹ فورس کے اہلکار شاہ وزیر خان کو شہید کردیا۔ ایلیٹ فورس کے بہادر سپوت کانسٹیبل شاہ وزیر خان شہید کی نمازِ جنازہ پولیس لائن باجوڑ میں پورے سرکاری اعزاز کے ساتھ ادا کردی گئی۔ نماز جنازہ میں کمانڈنٹ باجوڑ سکاؤٹس، ڈپٹی کمشنر باجوڑشاہد علی، ڈسٹرکٹ پولیس آفیسر باجوڑوقاص رفیق، پولیس اور سول محکموں کے آفسران، معززین علاقہ اور سول سوسائٹی کے افراد نے بڑی تعداد میں شرکت کی۔نماز جنازہ کے بعد پولیس کے چاق و چوبند دستے نے شہید کے جسد خاکی کو سلامی پیش کی۔ شہید کی قربانی کو خراج عقیدت پیش کرنے کیلئے پھولوں کے گلدستے رکھے گئے اور ملک و قوم کی سلامتی کے ساتھ ساتھ شہید کے درجات کی بلندی کیلئے خصوصی دعا کی گئی۔بعد ازاں شہید کے میت کو پولیس کے سپیشل سکواڈ کے ہمراہ انکے آبائی علاقے کو روانہ کیا گیا جہاں پر انکے تدفین پورے سرکاری اعزاز کیساتھ کی جائیگی۔