خضدار(این این آئی) ڈپٹی کمشنر خضدار یاسر اقبال دشتی سے ایگزیکٹو انجینئر آپریشن کیسکو خضدار سیف اللہ بلوچ نے ایک اہم ملاقات کی، جس میں خضدار ٹیچنگ ہسپتال کو براہ راست گریڈ اسٹیشن سے جلد از جلد لنک کرنے اور بجلی کی بلاتعطل ترسیل کو یقینی بنانے پر تبادلہ خیال کیا گیا۔ ملاقات میں بجلی سے متعلق دیگر مسائل بھی زیرِغور آئے اور ان کے فوری حل کے لیئے اقدامات پر اتفاق کیا گیا۔ ڈپٹی کمشنر خضدار یاسر اقبال دشتی نے کیسکو کی کاوشوں کو سراہتے ہوئے کہا کہ ضلعی انتظامیہ عوام کو بہتر سہولیات کی فراہمی کے لیئے کیسکو کے ساتھ مکمل تعاون کرے گی۔ انہوں نے ہسپتال کو مستحکم بجلی کی فراہمی کو ترجیح قرار دیا تاکہ مریضوں کو علاج معالجے میں کسی قسم کی دشواری نہ ہو۔ایگزیکٹو انجینئر سیف اللہ بلوچ نے کہا کہ کیسکو عوام کو اطمینان حد تک بجلی فراہمی کے لئے کوشاں ہے دن رات کوشاں ہے اور ٹیچنگ ہسپتال کو گریڈ اسٹیشن سے منسلک کرنے کا منصوبہ جلد مکمل کیا جائے گا۔ انہوں نے ڈپٹی کمشنر کی حمایت کو سراہا اور یقین دلایا کہ کیسکو بجلی کے مسائل کے حل کے لیئے ہر ممکن کوشش کرے گا۔
ڈپٹی کمشنر خضداراور چیف ایگزیکٹو کیسکو کی ملاقات، ٹیچنگ ہسپتال کو بجلی ترسیل جلد یقینی بنانے کے عزم کا اظہار
