صحبت پور،سبزی فروش ریڑھی بانوں کی ضلعی انتظامیہ کے رویئے کیخلاف احتجاجاًً ریڑھیاں بند کردیں

صحبت پور(این این آئی)صحبت پور میں سبزی فروش ریڑھی بانوں کی ضلعی انتظامیہ کے رویئے کیخلاف احتجاجاًً ریڑھیاں بند کرکے عوام کو سبزیوں کی ترسیل بند کردی لوگ سبزی کی حصول کیلئے سخت پریشان تفصیلات کے مطابق ضلعی انتظامیہ اسسٹنٹ کمشنر اور بازار یونین سبزی فروشوں کے درمیان سرد جنگ کافی عرصے سے جاری ہے۔گزشتہ دنوں اسسٹنٹ کمشنر صحبت پور نے سبزی فروشوں ریڑھی بانوں کو شہر کے وسط بازار میں ریڑھیاں نہ کھڑی کرنے کے سخت احکامات صادرکئے۔جس بازار یونین کے صدر ذاکر حسین ناوڑا سینئر نائب صدر عبدالعزیز گولہ و دیگر عہدیداروں نے میٹنگ کرکے فیصلہ کیا کہ آئے روز اسسٹنٹ کمشنر صحبت پور کی ظلم و زیادتیوں کی وجہ سے تنگ آکر پورے شہر میں سبزیوں پھلوں کی ریڑھیاں و دکانیں اسسٹنٹ کمشنر صحبت پور کی تبدیلی تک بند رکھیں گے۔بازار یونین کے عہدیداروں کا کہنا ہے کہ جب سے موجودہ اسسٹنٹ کمشنر نے چارج سنبھالا ہے تب سے ہی غریب ریڑھی بانوں پر انکی نا تھمنے والی زیادتیوں کا سلسلہ روز بروز بڑھتی جا رہی ہیں آئے روز کسی نہ کسی بہانے سے غریب ریڑھی بانوں کو تنگ اور حراساں کیا جاتا رہا ہے۔ گزشتہ دنوں صاحب موصوف نے حکم جاری کیا کہ ریڑھی بان اپنی جگہیں چھوڑ کر ویرانے میں جاکر ریڑھیاں لگا دیں جہاں کسی بھی قسم کی کوئی سہولت میسر نہیں ہے۔جس پر ہم نے اسسٹنٹ کمشنر صحبت پور کے رویئے کیخلاف احتجاجاًً سبزی و فروٹس وغیرہ کے دکانیں و ریڑھیاں بند کردی ہیں جب تک موجود اسسٹنٹ کمشنر صحبت پور کا تبادلہ نہیں ہوگا ہم سبزی کی ریڑھیاں نہیں کھولیں گے۔دوسری جانب شہری بھر میں سبزیوں کی دکانیں اور ریڑھیاں بند ہونے سے لوگوں کو سبزی نہ ملنے سے شدید پریشانیوں کا سامنا کرنا پڑتا ہے عوامی حلقوں نے بھی حکام بالا سے نوٹس لینے کا مطالبہ کیا ہے۔