علی دوست یلانزئی جہاں بھی ذمہ داری سنبھالتے ہیں ہمیشہ خوش اخلاقی، نرم مزاجی،اچھے رویئے کیساتھ عوام سے پیش آتے ہیں، عوامی حلقے

دالبندین (این این آئی)ریکوڈک مائننگ کمپنی میں کمیونٹی انگیجمنٹ منیجر کے طور پر خدمات انجام دینے والے علی دوست یلانزئی کو ضلع چاغی کے عوام کی جانب سے خراجِ تحسین پیش کیا جا رہا ہے۔ انہوں نے نہ صرف کمپنی میں اپنی پیشہ ورانہ صلاحیتوں کا لوہا منوایا ہے بلکہ مختلف غیر سرکاری تنظیموں (NGOs) میں بھی نمایاں خدمات انجام دی ہیں۔علی دوست یلانزئی بلوچستان تیکوانڈو ایسوسی ایشن کے نیشنل اور انٹرنیشنل سطح کے ایک باصلاحیت کھلاڑی بھی ہیں، جنہوں نے کھیلوں کے فروغ اور نوجوانوں کو صحت مند سرگرمیوں کی طرف راغب کرنے میں اہم کردار ادا کیا۔ ان کی مثبت سوچ اور جدوجہد سے ضلع چاغی کے عوام بخوبی آگاہ ہیں۔عوامی حلقوں کا کہنا ہے کہ علی دوست یلانزئی جہاں بھی ذمہ داری سنبھالتے ہیں، خواہ وہ ریکوڈک مائننگ کمپنی کا دفتر ہو یا کوئی این جی او، وہ ہمیشہ خوش اخلاقی، نرم مزاجی اور اچھے رویے کے ساتھ عوام سے پیش آتے ہیں۔ ان کے دروازے عوام کے لیے ہمیشہ کھلے رہتے ہیں۔مقامی افراد کا مزید کہنا ہے کہ افسوس کے ساتھ یہ رویہ بھی دیکھنے میں آتا ہے کہ رخشان ڈویڑن (چاغی، نوشکی، خاران) سے تعلق رکھنے والے آفیسران پر انگلیاں اٹھائی جاتی ہیں، جبکہ کوئٹہ، سندھ یا پنجاب سے آنے والے افسران پر سوال نہیں کیے جاتے۔ حالانکہ اگر رخشان ڈویڑن سے کسی پڑھے لکھے اور ہنر مند نوجوان کو ایک بڑے ادارے میں کام کرنے کا موقع ملا ہے تو یہ خوشی اور فخر کی بات ہونی چاہیے، نہ کہ تنقید۔عوامی رائے کے مطابق علی دوست یلانزئی ایک تعلیم یافتہ، ہنر مند اور باصلاحیت نوجوان ہیں جنہوں نے اپنے کردار اور کارکردگی سے یہ ثابت کیا ہے کہ رخشان ڈویڑن کے لوگ بھی قومی اور بین الاقوامی سطح پر اپنی صلاحیتوں کا مظاہرہ کر سکتے ہیں۔ نوجوانوں کو چاہیے کہ اگر فی الحال انہیں بڑے اداروں میں ملازمت کا موقع نہیں مل رہا تو صبر و حوصلے کے ساتھ انتظار کریں اور اپنی محنت جاری رکھیں۔کھیلوں اور سماجی خدمات کے شعبے میں علی دوست یلانزئی کی جدوجہد اور لگن ضلع چاغی کے نوجوانوں کے لیے ایک بہترین مثال ہے۔ عوامی حلقے پْرامید ہیں کہ وہ آئندہ بھی کھیل، سماجی اور پیشہ ورانہ شعبوں میں اپنی خدمات جاری رکھیں گے۔