تلخ کلامی اوردھمکیاں،صوبائی وزیر مولوی محمدسرور موسیٰ خیل کیخلاف2مختلف تھانوں میں مقدمات درج،گرفتار کرلیا گیا

کوئٹہ(این این آئی) سیکرٹری سی اینڈ ڈبلیو لعل جان جعفر سے تلخ کلامی اور گھر والوں کو ڈرانے دھمکانے پر جمعیت علماء اسلام کے رہنماوسابق صوبائی وزیر مولوی محمدسرور موسیٰ خیل کے خلاف2مختلف تھانوں میں مقدمات درج کرکے گرفتار کرلیا گیا۔سیکرٹری سی اینڈ ڈبلیو لعل جان جعفر نے سول لائن پولیس تھانے میں اطلاع دی ہے کہ سابق صوبائی وزیر مولوی محمد سرور موسیٰ خیل انکے دفتر میں آئے جہاں انہوں نے مجھ سے تلخ کلامی کی اورسنگین نتائج کی دھمکیاں دیں جبکہ سابق صوبائی وزیر کے 5،6افراد انکی رہائش گاہ کسٹم کالونی ائیر پورٹ روڈ آئے جہاں میرے گھر والوں کو ڈرایا اور ہراساں کیا جبکہ گھر سے جاتے وقت گھر کے دروازے اوردیوار پر دھمکی آمیز پیغاما ت لکھے جس سے انہیں اورانکے اہل خانہ کو جان کا خطرہ ہے جس پر سول لائن پولیس تھانہ نے مولوی سرور موسیٰ خیل کے خلاف زیردفعہ ت پ B/506،504ت پ، 353ت پ، 186 ت پ اور 34ت پ کے تحت مقدمہ درج کرلیا جبکہ ائیر پورٹ پولیس تھانہ نے بھی سیکرٹری لعل جان جعفر کی درخواست پر مولوی سروری موسیٰ خیل کے خلاف ایف آئی آر درج کرلی۔ پولیس نے سابق صوبائی وزیر مولوی محمد سرور موسیٰ خیل کو گرفتار کرکے مزیدکارروائی شروع کردی۔