انجینئر امیر مقام سے سعد اللہ ترین کی ملاقارت

پشین(این این آئی) وفاقی وزیر برائے امور کشمیر و گلگت بلتستان انجینئر امیر مقام سے پاکستان مسلم لیگ (ن) پشین کے ضلعی صدر اور سابق امیدوار برائے قومی اسمبلی سعد اللہ ترین نے اسلام آباد میں ملاقات کی۔ ملاقات میں پشین کے عوامی مسائل، ترقیاتی ضروریات اور افغان مہاجرین کی وطن واپسی سمیت مختلف امور پر تفصیلی تبادلہ خیال کیا گیا۔ملاقات میں پشین کے بنیادی ڈھانچے کی ترقی، تعلیم و صحت کی سہولتوں کی فراہمی اور علاقے کی محرومیوں کے ازالے کے لیے عملی اقدامات تجویز کیے گئے۔ سعد اللہ ترین نے وفاقی وزیر کو پشین کے عوام کو درپیش مسائل اور مقامی سطح پر درکار سہولیات سے آگاہ کیا۔اس موقع پر افغان مہاجرین کی وطن واپسی اور اس سے جڑے سماجی و انتظامی مسائل پر بھی تفصیلی گفتگو ہوئی۔ دونوں رہنماؤں نے اس بات پر اتفاق کیا کہ مہاجرین کی واپسی کے عمل کو منظم اور عوام دوست انداز میں آگے بڑھانے کی ضرورت ہے تاکہ مقامی آبادی کو کسی قسم کی مشکلات کا سامنا نہ کرنا پڑے۔وفاقی وزیر انجینئر امیر مقام نے سعد اللہ ترین کو یقین دہانی کرائی کہ پشین کے مسائل کے حل اور افغان مہاجرین کی واپسی سے متعلق امور پر وفاقی حکومت ہر ممکن تعاون فراہم کرے گی۔ ان کا کہنا تھا کہ مسلم لیگ (ن) کی حکومت عوامی خدمت کے ایجنڈے پر گامزن ہے اور بلوچستان کے تمام اضلاع میں ترقیاتی منصوبے ترجیحی بنیادوں پر مکمل کیے جائیں گے۔