خضدار ٹیچنگ ہسپتال خضدار کو 24 گھنٹے بجلی کی فراہمی کے لیئے 16 کلومیٹر ٹرانسمیشن لائن کا افتتاح

خضدار(این این آئی) خضدار میں ٹیچنگ ہسپتال کو بلاتعطل بجلی کی فراہمی کے لیئے 16 کلومیٹر طویل ٹرانسمیشن لائن کا منصوبہ مکمل کر لیا گیا، جس پر 3 کروڑ روپے سے زائد کی لاگت آئی۔ اس منصوبے سے ہسپتال میں مریضوں کو مسلسل بجلی کی سہولت میسر ہوگی، خاص طور پر آپریشن تھیٹر (او ٹی) میں بجلی کی دستیابی سے طبی خدمات میں بہتری آئے گی۔اس منصوبے کا افتتاح ڈپٹی کمشنر خضدار یاسر اقبال دشتی نے کیا۔ منصوبے کا ابتدائی خاکہ کمشنر قلات ڈویڑن ڈاکٹر طفیل بلوچ نے اس وقت تیار کیا جب وہ ڈپٹی کمشنر خضدار کے عہدے پر تعینات تھے۔ سابق ڈپٹی کمشنر خضدار بشیر احمد بڑیچ نے بھی اس منصوبے میں گہری دلچسپی لی اور اسے آگے بڑھایا۔ موجودہ ڈپٹی کمشنر خضدار یاسر اقبال دشتی اور ایگزیکٹو انجینئر آپریشن کیسکو خضدار سیف اللہ بلوچ کی سربراہی میں کیسکو ٹیم نے اس منصوبے کو پایہ تکمیل تک پہنچایا۔انہوں نے دن رات محنت کی۔ کیسکو کی تکنیکی ٹیم نے جدید ٹیکنالوجی اور معیاری وسائل کا استعمال کرتے ہوئے اس 16 کلومیٹر طویل ٹرانسمیشن لائن کو بچھایا، جو ہسپتال کی بجلی کی ضروریات کو پورا کرنے کے لیئے خصوصی طور پر ڈیزائن کی گئی ہے۔یہ منصوبہ خضدار کے ٹیچنگ ہسپتال کے لیئے ایک گیم چینجر ثابت ہوگا، کیونکہ اب تک ہسپتال کو بجلی کی لوڈ شیڈنگ اور تکنیکی مسائل کا سامنا کرنا پڑتا تھا، جس سے مریضوں کی دیکھ بھال اور طبی عمل متاثر ہوتے تھے۔ اس ٹرانسمیشن لائن کی بدولت ہسپتال میں نہ صرف آپریشن تھیٹر بلکہ ایمرجنسی وارڈ، آئی سی یو، اور دیگر اہم شعبوں میں بھی بجلی کی مسلسل فراہمی ممکن ہو سکے گی۔ اس سے مریضوں کو بروقت اور معیاری طبی سہولیات کی فراہمی یقینی بنائی جا سکے گی، جو بالخصوص ایمرجنسی حالات میں زندگی بچانے کے لیے انتہائی اہم ہے۔خضدار کے شہریوں اور ہسپتال کے عملے نے اس منصوبے کی تکمیل پر اطمینان کا اظہار کیا ہے اور اسے خضدار کے صحت کے نظام میں ایک سنگ میل قرار دیا ہے۔ مقامی افراد کا کہنا ہے کہ یہ منصوبہ نہ صرف ہسپتال کی کارکردگی کو بہتر بنائے گا بلکہ خضدار اور اس کے گردونواح کے عوام کے لیے صحت کی بہتر سہولیات تک رسائی کو بھی یقینی بنائے گا۔اس موقع پر ڈپٹی کمشنر یاسر اقبال دشتی نے کہا کہ یہ منصوبہ خضدار کے عوام کے لیئے ایک بڑی کامیابی ہے اور اس سے صحت کے شعبے میں نمایاں بہتری آئے گی۔ انہوں نے کیسکو ٹیم، ڈاکٹر طفیل بلوچ کے کردار کو سراہا اور کہا کہ یہ منصوبہ ٹیم ورک اور عزم کی ایک بہترین مثال ہے۔ ایگزیکٹو انجینئر سیف اللہ بلوچ نے بھی اپنی ٹیم کی کاوشوں کو خراج تحسین پیش کیا اور کہا کہ کیسکو خضدار کے عوام کو بہتر سہولیات فراہم کرنے کے لیئے ہر ممکن کوشش جاری رکھے گی۔