ایران کے شہر زاہدان میں چاغی تیکوانڈو ٹیم کا شاندار استقبال

دالبندین(این این آئی)ایران کے شہر زاہدان میں خارکوئی ہاؤس میں الحاج سردار عبداللہ خارکوئی سے پاکستان کے صوبہ بلوچستان ضلع چاغی کی تیکوانڈو ایسوسی ایشن شہید دلاور خان ایجباڑی اکیڈمی کی ٹیم نے ملاقات کی۔ ٹیم کی قیادت کوچ فیروزشاہ نوتیزئی نے کی جبکہ ان کے ہمراہ اسسٹنٹ کوچ فیض اللہ عابد، کھلاڑی بصیر احمد، عادل، اسفند یار محمد حسنی اور عزیر آغا محمد حسنی شامل تھے۔اس موقع پر صوفی اختر محمد خارکوئی، حاجی خان محمد خارکوئی اور حاجی عبدالحمید محمد حسنی لیوارزئی بھی موجود تھے۔الحاج سردار عبداللہ خارکوئی نے چاغی کی تیکوانڈو ٹیم کو ایران آمد پر خوش آمدید کہا اور کہا کہ پاکستان اور ایران کے درمیان کھیلوں کے فروغ کے حوالے سے ایسے اقدامات نہ صرف نوجوانوں کو بہتر مواقع فراہم کرتے ہیں بلکہ دونوں ممالک کے تعلقات کو بھی مزید مضبوط بناتے ہیں۔انہوں نے کہا کہ کھیل نوجوان نسل کو مثبت سرگرمیوں کی طرف راغب کرتے ہیں اور سرحد کے دونوں اطراف کے کھلاڑی ایک دوسرے کے تجربات سے فائدہ اٹھا کر اپنی صلاحیتوں میں اضافہ کرسکتے ہیں۔تقریب کے اختتام پر سردار عبداللہ خارکوئی نے چاغی تیکوانڈو ٹیم کی ایران آمد کو خوش آئند قرار دیتے ہوئے ان کا شکریہ ادا کیا اور امید ظاہر کی کہ آئندہ بھی کھیلوں کے میدان میں پاکستان اور ایران ایک دوسرے کے ساتھ تعاون جاری رکھیں گے۔