بلوچستان ریزیڈنشل کالج لورالائی کو شہید کیپٹن وقار کاکڑ کے نام سے منسو ب کردیا گیا

کوئٹہ(این این آئی) حکومت بلوچستان نے فورسز کے شہداء کی لازوال قربانیوں کو خراجِ عقیدت پیش کرنے کے لیے صوبے کے دو اہم تعلیمی اداروں کے نام تبدیل کر کے انہیں شہداء کے ناموں سے منسوب کر دیا ہے۔ وزیر اعلیٰ بلوچستان میر سرفراز بگٹی کی خصوصی ہدایت پر بلوچستان ریزیڈنشل کالج لورالائی کو شہید کیپٹن وقار کاکڑ کے نام سے منسو ب کرتے ہوئے اس کا نیا نام “کیپٹن وقار کاکڑ شہید بلوچستان ریزیڈنشل کالج” رکھا گیا ہے۔ اسی طرح گورنمنٹ بوائز ہائی اسکول کان مہترزئی کو تبدیل کر کے “شہید کانسٹیبل الطاف الرحمان ہائی اسکول” کا نام دیا گیا ہے وزیراعلیٰ میر سرفراز بگٹی نے کہا کہ یہ اقدام نہ صرف شہداء کی عظیم قربانیوں کو خراجِ عقیدت ہے بلکہ نئی نسل کو ان کے مشن سے روشناس کرانے کی ایک عملی کوشش بھی ہے۔ انہوں نے کہا کہ وطن کی حفاظت کے لیے اپنی جانیں نچھاور کرنے والے شہداء قوم کے ہیرو ہیں، ان کی قربانیاں کبھی فراموش نہیں کی جا سکتیں وزیراعلیٰ کی ہدایت پر محکمہ ہائر ایجوکیشن اور محکمہ سیکنڈری ایجوکیشن کی جانب سے ان تعلیمی اداروں کے ناموں کی تبدیلی کے باضابطہ نوٹیفکیشن بھی جاری کر دیے گئے ہیں۔