زیارت سے اغواء اسسٹنٹ کمشنر افضل باقی سمیت دو افراد کے قتل کرنے کی اطلاعات

کوئٹہ(این این آئی) بلوچستان کے ضلع زیارت سے اغواء ہونے والے اسسٹنٹ کمشنر افضل باقی سمیت دو افراد کو قتل کرنے کی اطلاعات، لیویز نے ضلع ہرنائی میں دو لاشوں کی موجودگی کی اطلاعات پر سرچ آپریشن شروع کردیا۔ لیویز حکام کے مطابق اتوار کو ہرنائی کے علاقے زرد آلو میں لیویز کو دو لاشوں کی موجودگی کی اطلاع ملی جس پر علاقے میں سرچ آپریشن کا آغاز کردیا گیا۔ حکام کے مطابق لاشوں کی تلاش کے لیے دشوار گزار علاقے میں ڈرون بھی استعمال کیے جارہے ہیں تاہم رات گئے تک لاشوں کی تلاش کا عمل جاری رہا۔ دوسری جانب 0اگست کو زیارت کے علاقے سے اغواء ہونے والے اسسٹنٹ کمشنر زیارت افضل باقی کو قتل کیے جانے کی بھی اطلاعات ہیں علاقائی ذرائع کے مطابق زردآلو میں موجود لاش اسسٹنٹ کمشنر افضل باقی اور ایک دوسرے شخص کی ہوسکتی ہیں۔اس حوالے سے انتظامیہ نے تاحال کسی قسم کی تصدیق نہیں کی تاہم سوشل میڈیا پر ایک لاش کی تصویر شیئر کی گئی ہے جو اسسٹنٹ کمشنر افضل باقی معلوم ہوتے ہیں۔ واضح رہے کہ اسسٹنٹ کمشنر افضل باقی اور ان کے بیٹے مستنصر بلال کو زیارت کے سیاحتی علاقے زیرزی پوائنٹ سے اغواء کیا تھا جبکہ وہ 3ستمبر 2025کو اغواء کے دوران ہی سرکاری ملازمت سے ریٹائرڈ ہوئے تھے۔