سعودیہ دفاعی معاہدے کے دور رس اثرات خطے کی سیاست، معیشت اور عالمی تعلقات پر مرتب ہوں گے،سابق وفاقی وزیرخلیل جارج

کوئٹہ(این این آئی)سابق وفاقی وزیرخلیل جارج نے کہا ہے کہ پاکستان اورسعودی عرب کے درمیان تاریخی دفاعی معاہدہ پاکستان کے لیے ایک مضبوط اقتصادی و معاشی تعاون کی بنیاد بھی بنے گا،پاک سعودیہ دفاعی معاہدے کے دور رس اثرات خطے کی سیاست، معیشت اور عالمی تعلقات پر بھی مرتب ہوں گے۔یہاں جاری ہونے والے ایک بیان میں سابق وفاقی وزیر خلیل جارج نے کہا کہ پاکستان اورسعودی عرب کے درمیان معاہدے پر دستخط ہوتے ہی مغربی دنیا اور پڑوسی ملک بھارت کی نیندیں حرام ہوگئی ہیں اور وہ پاکستان کے خلاف منفی پروپیگنڈہ کرنے میں مصروف ہیں۔انہوں نے کہا کہ پاکستان اورسعودی عرب کے درمیان معاہدے سے بھارت کو ہونے والی پریشانی فطری ہے، تاہم سعودی عرب یہ واضح کرچکا ہے کہ یہ ایک جامع دفاعی معاہدہ ہے جو تمام فوجی ذرائع کا احاطہ کرتا ہے اور یہ کسی مخصوص ملک یا واقعے کے خلاف نہیں بلکہ دونوں ممالک کے درمیان دیرینہ اور گہرے تعاون کو ادارہ جاتی شکل دینے کا عمل ہے۔ انہوں نے دفاعی معاہدے پر وزیراعظم پاکستان میاں محمد شہباز شریف،سعودی ولی عہد محمد بن سلمان،فیلڈ مارشل سید عاصم منیر کو مبارکباد دیتے ہوئے کہا کہ پاکستان اور سعودی اس دفاعی معاہدے کودیگر اسلامی ممالک تک پھیلا ئیں اوراپنی ایک مشترکہ فوج تشکیل دیں جو کسی بھی دشمن کی جارحیت کا مقابلہ کرسکے۔