ترقیاتی منصوبوں کی تکمیل سے شہریوں کو بہتر سفری سہولیات میسر آئیں گی، چیف انجینئر مواصلات

چھتر(این این آئی) چیف انجینئر مواصلات و تعمیرات نصیرآباد زون بشیر خان ناصر نے کہا ہے کہ حکومت بلوچستان اور صوبائی وزیر کے جاری کردہ فنڈز سے نصیرآباد ڈویژن میں ترقیاتی منصوبوں پر کام تیزی اور معیاری انداز میں جاری ہے۔ انہوں نے کہا کہ صوبائی حکومت کی خصوصی ہدایات کے مطابق جاری اسکیمات پر افسران اور انجینئرز براہ راست نگرانی کر رہے ہیں تاکہ منصوبے بروقت اور معیار کے مطابق مکمل ہو سکیں چیف انجنیئر روڈز نصیرآباد ڈویژن بشیر خان ناصر نے کہا کہ ترقیاتی منصوبوں کی تکمیل سے شہریوں کو بہتر سفری سہولیات میسر آئیں گی جبکہ زراعت اور کاروبار میں بھی ترقی کے نئے مواقع پیدا ہوں گے۔ ان کا کہنا تھا کہ عوامی فنڈز کو شفاف طریقے سے استعمال کیا جا رہا ہے اور اس سلسلے میں کسی قسم کی کوتاہی برداشت نہیں کی جائے گی انہوں نے مزید کہا کہ نصیرآباد ڈویژن کے مختلف اضلاع صحبت پور اوستہ محمد جعفرآباد میں سڑکوں کی تعمیر و توسیع سمیت کئی اہم منصوبے تکمیل کے مراحل میں ہیں جو نہ صرف عوام کو سہولت فراہم کریں گے بلکہ خطے میں ترقی و خوشحالی کے ایک نئے دور کا آغاز بھی کریں گے عوامی حلقوں نے صوبائی حکومت اور محکمہ مواصلات و تعمیرات کے اقدامات کو سراہتے ہوئے کہا ہے کہ اگر ترقیاتی منصوبے اسی تسلسل کے ساتھ مکمل ہوتے رہے تو نصیرآباد ڈویژن کی محرومیاں بڑی حد تک ختم ہو جائیں گی۔