آل پاکستان اخبار فروش فیڈریشن کے مرکزی صدر کا خضدار پریس کلب کا دورہ

خضدار(این این آئی) آل پاکستان اخبار فروش فیڈریشن کے مرکزی صدر اور صوبائی جنرل سیکریٹری بلوچستان میر احمد راسکو وال نے خضدار پریس کلب کا تفصیلی دورہ کیا۔ ان کے ہمراہ کوئٹہ کے مقامی اخبارات کے نیوز ایجنٹ عنایت اللہ سیاپاد اور سلطان رحیم بھی موجود تھے۔خضدار پریس کلب کے صدر عبداللہ شاہوانی، عبدالواحد رند اور دیگر عہدیداروں سے گفتگو کرتے ہوئے میر احمد راسکوہ وال نے کہا کہ ڑوب سے گوادر تک اخبارات کی صنعت سے وابستہ تمام افراد ایک جسم کی مانند ہیں اور ایک دوسرے کے لیے لازم و ملزوم ہیں۔ انہوں نے مزید کہا کہ صوبے بھر کے اخبار فروش اور صحافی انتہائی ایمانداری سے اپنی ذمہ داریاں نبھاتے ہیں اور عوامی مسائل کو اعلیٰ حکام تک پہنچانے کے لیے بھرپور کوششیں کر رہے ہیں۔انہوں نے خضدار کے صحافیوں کی خدمات کو سراہتے ہوئے کہا کہ انہوں نے تمام تر مشکلات کے باوجود صحافتی فرائض ادا کرنے میں قربانیاں دی ہیں۔ خضدار پریس کلب کے عہدیداروں نے صحافی برادری کی فلاح و بہبود اور پریس کلب کی ترقی کے لیے گراں قدر خدمات انجام دیں، جس سے یہ ادارہ ایک مثالی حیثیت اختیار کر گیا ہے۔