سنگل پارٹی کا قیام شہید نواب محمد اکبر خان بگٹی کے وژن اور قربانیوں کا تسلسل ہے جو آج وقت اور حالات کی اہم ضرورت بن چکا ہے،جے ڈبلیو پی

کوئٹہ(این این آئی)جمہوری وطن پارٹی نے اپنے بیان میں کہا ہے کہ سنگل پارٹی کا قیام شہید نواب محمد اکبر خان بگٹی کے وژن اور قربانیوں کا تسلسل ہے جو آج وقت اور حالات کی اہم ضرورت بن چکا ہے، اگر بلوچستاں کی تمام سیاسی جماعتیں اس فارمولے پر اتفاق کرلیں تو بلوچ اور پشتون اقوام اپنے ساحل و وسائل کے حقیقی مالک بن سکیں گے اور بلوچستان میں امن کا خواب شرمندہ تعبیر ہوگا۔بیان میں کہا گیا کہ وفاق کی نام نہاد جماعتوں نے گزشتہ 78 برسوں سے بلوچستان کا اپنے مفاد کے لیے استحصال کیا ہے، اور اب وقت آچکا ہے کہ بلوچستان کے سیاستدان سر جوڑ کر سنگل پارٹی کے پلیٹ فارم پر اکٹھے ہوں اپنے ذاتی اور گروہی اختلافات کو بالائے طاق رکھتے ہوئے ہمیں بلوچستان اور اس کے عوام کے مستقبل کے بارے میں سوچنا ہوگا۔بیان میں کہا گیا کہ اپنے حق اور حقوق، امن، انصاف اور ساحل و وسائل پر اختیار حاصل کرنے کے لیے سب کو مخلصی اور دیانتداری کے ساتھ اتفاق رائے پیدا کرنا ہوگا۔ یہی واحد راستہ ہے جس سے بلوچستان ترقی، خوشحالی اور امن کی جانب گامزن ہوسکتا ہے۔