بلوچستان کے قدرتی وسائل پر سب سے پہلا حق مقامی افراد کا ہے،عالم کاکڑ

کوئٹہ(این این آئی) پاکستان تحریک انصاف بلوچستان کے سابق ایڈیشنل جنرل سیکرٹری عالم خان کاکڑ نے کہا ہے کہ بلوچستان کے قدرتی وسائل پر سب سے پہلا حق یہاں کے مقامی افراد کا ہے اگر عوام کوانکے وسائل سے محروم کرنے کی کوشش کی گئی تو بھر پور عوامی مزاحمت کریں گے،مائنز اینڈ منرل ایکٹ پر مشاورت میں ملک کی سب سے بڑی سیاسی جماعت پی ٹی آئی کو بھی شامل کیا جائے۔ یہاں جاری ہونے والے ایک بیان میں عالم خان کاکڑ نے کہا کہ بلوچستان کے وسائل پر کسی بھی صورت سمجھوتہ قبول نہیں کیا جا سکتا مائنز اینڈ منرلز ایکٹ میں شامل وہ متنازعہ شقیں جن کے ذریعے وفاقی اداروں کو بلاجواز اختیار دیا گیا مقامی کمیونٹی کو نظرانداز کیا گیااور صوبے کے وسائل پر غیر مقامی اجارہ داری قائم کرنے کی راہ ہموار کی گئی ہے یہ سب ناقابلِ قبول ہیں۔انہوں نے کہا کہ بلوچستان کے قدرتی وسائل پر سب سے پہلا حق مقامی آبادی کا ہے جو ہزاروں سال سے یہاں آباد ہے اگر ان کو نظرانداز کر کے باہر سے آنے والے طاقتور گروہوں اور سرمایہ داروں کو نوازا گیا تو یہ اقدام صوبے میں بدامنی، مزاحمت اور شورش کو جنم دے گا جس کی تمام تر ذمہ داری حکومت پر عائد ہوگی۔انہوں نے کہا کہ ہم یہ بھی واضح کر دینا چاہتے ہیں کہ مائنز اینڈ منرلز جیسے حساس اور اہم قانون پر کسی ایک پارٹی یا فرد کو فیصلے کا اختیار نہیں دیا جا سکتا ہم مطالبہ کرتے ہیں کہ بلوچستان کی تمام سیاسی جماعتوں کو اس قانون پر برابر نمائندگی دی جائے تاکہ یہ قانون وسیع تر اتفاقِ رائے سے تشکیل پائے اور عوام کو اس پر اعتماد ہو۔انہوں نے کہا کہ ہم حکومت کو تنبیہ کرتے ہیں کہ اگر بلوچستان کے عوام کو اْن کے وسائل سے محروم رکھنے کی کوشش کی گئی تو ہم بھرپور عوامی مزاحمت کریں گے تاہم اگر حکومت سنجیدگی کے ساتھ تمام اسٹیک ہولڈرز کو ساتھ بٹھا کر متنازعہ شقوں پر نظرثانی کرے اور مقامی آبادی کو حقیقی حصہ دار بنائے تو ہم ہر تعمیری بات چیت کے لیے تیار ہیں۔انہوں نے کہا کہ یہ صوبہ کسی کی جاگیر نہیں ہے بلوچستان کے وسائل بلوچستان کے عوام کی امانت ہیں اور ہم اس امانت پر کسی بھی قسم کا سمجھوتہ نہیں ہونے دیں گے۔انہوں نے کہا کہ صوبائی حکومت کی جانب سے مائنز اینڈ منرلز ایکٹ پر سیاسی جماعتوں سے مشاورت ایک اچھا فیصلہ ہے ہمارامطالبہ ہے کہ ملک کی سب سے بڑی سیاسی جماعت پی ٹی آئی کو بھی مشاورت میں شامل کیا جائے۔