زرعی صارفین شمسی توانائی پر منتقلی کے بعد ٹرانسفارمرز، ایچ ٹی کھمبے،برقی آلات کی واپسی میں کیسکوسے تعاون کریں،کیسکو ترجمان

کوئٹہ(این این آئی)کوئٹہ الیکٹرک سپلائی کمپنی(کیسکو)نے وفاقی وصوبائی حکومت کی جانب سے صوبہ کے زرعی ٹیوب ویل کنکشنز کی شمسی توانائی پر منتقلی کے بعداُن تمام زمینداروں کے برقی کنکشنزمنقطع کردئیے ہیں۔ جسکے بعد Dismantling یعنی زرعی ٹرانسفارمرز، ایچ ٹی کھمبے اور ان سے منسلک دیگر برقی آلات بھی ہٹائیے جا رہے ہیں تاکہ یہ زرعی کنکشنز دوبارہ کیسکونیٹ ورک سے منسلک نہ ہوسکیں۔ تاہم صوبہ کے بعض علاقوں کے زمینداروں نے اس منصوبہ کی تکمیل کے سلسلے میں عدم تعاون کرتے ہوئے ابھی تک زرعی ٹرانسفارمرز اور دیگر برقی آلات واپس نہیں کئے ہیں۔ حکومت کی جانب سے سولرائزیشن منصوبہ میں شامل زمینداروں کو رقوم کی ادائیگی پر زرعی صارفین ٹرانسفارمرز،کھمبے اور دیگر برقی آلات کیسکوکو واپس کرنے کے پابندہیں۔کیسکونے شمسی توانئی پر منتقل ہونے والے تمام زرعی صارفین سے اپیل کی ہے کہ وہ حکومت کی جانب سے سولرائزیشن کی مد میں رقم ملنے کے بعد اپنے زرعی ٹرانسفارمرز،ایچ ٹی کھمبے اور ان سے منسلک دیگر برقی آلات کی واپسی کے عمل میں کیسکوٹیموں سے تعاون کریں۔