وطن کے دفاع کیلئے جانوں کے نذرانے پیش کرنے والے شہدا کو خراج تحسین پیش کرنے کیلئے (آج) یوم ترحیم منایا جائے گا،طارق جعفری

کوئٹہ (این این آئی) تحریک نفاذ فقہ جعفریہ بلوچستان کے ترجمان لسان تحریک طارق جعفری نے کہا ہے کہ وطن عزیز پاکستان کو مسائل، مشکلات اور بحرانوں سے نجات کیلئے قائد اعظم و علامہ اقبال کے تصورِ پاکستان کو حرزِجاں بنانا ہوگا، معاشی و سیاسی استحکام اور مضبوط پاکستان کے لیے وسیع تر قومی اتحاد،یکجہتی و یگانگت کی ضرورت ہے،ٹی این ایف جے کے سربراہ علامہ آغا سید حسین مقدسی کی خصوصی ہدایت پر ’ایام عزائے حسینی کے دوران شہید اور وفات پا جانے والے بلا تفریق مسلک و مکتب مومنین و مسلمین کی بلندی درجات کیلئے جمعہ 26 ستمبر کو ’یوم ترحیم‘ منایا جائیگا، اس موقع پر قرآن خوانی، مجالس تراحیم اور دینی تقریبات میں دہشتگردی کے خلاف آپریشن میں جانوں کے نذرانے پیش کرنے والے عساکر پاکستان، پولیس کے سپوتوں، شہدائے دین و وطن کو خراج تحسین اور ایام عزائے حسینی میں وفات پانے والوں کی بلندی درجات کیلئے دعائیں کی جائیں۔انہوں نے اہل پاکستان سے اپیل کی کہ یوم ترحیم کے موقع پر مادر وطن کے امن اور دفاع کیلئے جانیں قربان کرنے والے شہداء کو خراج تحسین پیش کیا جائے اوران مرحومین کی مغفرت کیلئے بالخصوص دعائیہ تقاریب کاانعقاد کیا جائے نے کہا کہ پاکستان تمام مکاتب فکر کی مشترکہ جدوجہد کا ثمر ہے۔ تمام مکاتب، مسالک، قومیتوں، صوبوں کو ان کے حقوق کی ادائیگی کرنا بانیان پاکستان کا خواب تھا اور یہی وطن عزیز کی یکجہتی کی ضمانت ہے۔انہوں نے کہا کہ امن و محبت مضبوطی کی علامت اور منافرت و ظلم وحدت میں دراڑیں ڈالنے کا باعث بنتے ہیں۔