دالبندین،چوری کی وارداتوں میں اضافہ،نامعلوم مسلح افراد ایک شخص سے نقدی،موبائل فون چھین کرفرار

دالبندین (این این آئی)دالبندین میں چوری کی وارداتوں میں تشویشناک حد تک اضافہ ہو گیا ہے۔ اب چور دن دہاڑے سفید پوش افراد کو بھی نہیں بخش رہے۔ موٹر سائیکل سوار کہیں بھی کسی تنہا اور پیدل شخص کو دیکھ کر پستول نکال لیتے ہیں اور لوٹ مار کر فرار ہوجاتے ہیں۔آج صبح سنگی بند اور پاٹھک کے درمیان موٹر سائیکل پر سوار دو افراد نے گن پوائنٹ پر سفر خان حسنزی سے 11 ہزار روپے نقد اور اس کا موبائل فون چھین لیا اور فرار ہوگئے۔ سفر خان نے فوری طور پر تھانے جا کر پولیس کو تمام صورتحال سے آگاہ کردیا۔شہر کے اندر آئے روز لوگوں کو لوٹنا اب معمول بن چکا ہے۔ عوامی حلقوں نے پولیس انتظامیہ سے مطالبہ کیا ہے کہ فوری طور پر چوروں کے خلاف کارروائی کرکے عام شہریوں کو تحفظ فراہم کیا جائے۔ اب گھر سے بازار اور بازار سے گھر پیدل جانا مشکل ہوگیا ہے، اور کوئی بھی شہری خود کو محفوظ تصور نہیں کررہا۔