مولانا محمد اسلم گزگی کی حافظ حمیداللہ مینگل سے ملاقات، محسن انسانیت کانفرنس میں شرکت کی دعوت

خضدار(این این آئی)مدرسہ تفہیم القرآن قادر آباد خضدار کے مدیر مولانا محمد اسلم گزگی نے انجمن تاجران خضدار کے صدر حافظ حمیداللہ مینگل سے ان کے دفتر میں ملاقات کی۔ ملاقات کے دوران مولانا محمد اسلم گزگی نے حافظ حمیداللہ مینگل کو 2 اکتوبر کو منعقد ہونے والی “محسن انسانیت کانفرنس” میں شرکت کی دعوت دی۔مولانا محمد اسلم نے حافظ حمیداللہ سے درخواست کی کہ آل پارٹیز شہری ایکشن کمیٹی اور انجمن تاجران کی جانب سے بجلی کے مسئلے پر یکم اور 2 اکتوبر کو دی گئی شٹر ڈاؤن اور پہیہ جام ہڑتال کی کال واپس لی جائے، کیونکہ اس سے محسن انسانیت کانفرنس کے انعقاد پر اثر پڑ سکتا ہے۔حافظ حمیداللہ مینگل نے جواب میں کہا کہ 28 ستمبر کو آل پارٹیز شہری ایکشن کمیٹی کا اجلاس طلب کیا گیا ہے، جس میں ہڑتال کی تاریخ میں تبدیلی پر غور کیا جائے گا اور اسے آگے بڑھایا جا سکتا ہے۔ انہوں نے مولانا محمد اسلم کو یقین دلایا کہ اس سلسلے میں مثبت فیصلہ کیا جائے گا۔یہ ملاقات انجمن تاجران خضدار کے دفتر میں خوشگوار ماحول میں ہوئی، اور دونوں رہنماؤں نے باہمی تعاون اور خیر سگالی کے جذبے کا اظہار کیا۔