صحبت پور، موسمیاتی تبدیلیوں و دیگر سماجی مسائل پر آگاہی فراہم کرنے کیلیے سیمینار

صحبت پور(این این آئی)صحبت پور میں ٹرانسپیرنسی انٹرنیشنل پاکستان اورجیو این جی او کے زیرِ اہتمام موسمیاتی تبدیلیوں اور دیگر سماجی مسائل پر آگاہی فراہم کرنے کے لیے ایک اہم سیمینار منعقد کیا گیا۔ اس موقع پر سول سوسائٹی کے نمائندوں، صحافیوں، خواتین اور شہریوں کی بڑی تعداد شریک ہوئی۔سیمینار کا مقصد عوام کو موسمیاتی تبدیلی کے بڑھتے ہوئے خطرات اور دیگر اہم سماجی مسائل سے آگاہ کرنا تھا۔ مقررین نے اپنے خطاب میں کہا کہ موسمیاتی تبدیلی صرف زمین کے درجہ حرارت کو نہیں بڑھا رہی بلکہ زرعی پیداوار میں کمی، پانی کے وسائل کی قلت اور انسانی صحت کے مسائل کو بھی جنم دے رہی ہے۔ ان کے مطابق اگر اس سنگین مسئلے پر بروقت توجہ نہ دی گئی تو مستقبل کی نسلوں کو ناقابلِ تلافی نقصانات کا سامنا کرنا پڑے گا۔تقریب میں کرپشن کے خلاف آگاہی بھی فراہم کی گئی۔ مقررین نے بتایا کہ 2021 کے ایکٹ کے تحت ہر شہری کو یہ قانونی حق حاصل ہے کہ وہ کسی بھی سرکاری افسر سے مطلوبہ معلومات طلب کر سکتا ہے۔ اس قانون کے نفاذ سے شفافیت کو فروغ اور کرپشن کے خاتمے میں مدد مل سکتی ہے۔سیمینار کے نمایاں شرکاء میں عبدالسلام مگسی، ایگزیکٹو ڈائریکٹر جینڈر اینڈ ایمپاورمنٹ آرگنائزیشن، پولیس آفیسر منٹھارعلی ہانبھی اور ڈاکٹر عبدالحئی کھوسہ شامل تھے۔ شرکاء نے اس بات پر زور دیا کہ ایسے پروگرامز عوامی شعور اجاگر کرنے اور مسائل کے حل کے لیے نہایت اہم کردار ادا کرتے ہیں۔مقررین اور شرکاء نے اس بات پر زور دیا کہ موسمیاتی تبدیلی اور کرپشن جیسے مسائل کا مقابلہ صرف اجتماعی کوششوں اور عوامی شعور سے ہی ممکن ہے، لہٰذا اس نوعیت کی آگاہی مہمات کا سلسلہ مستقل طور پر جاری رہنا چاہیے۔