سوشل ویلفیئر کے قائم 450سینٹرز میں خواتین کو فیملی پلاننگ بارے معلومات کی فراہمی،ادویات اوردیگر سامان فراہم کیا جارہا ہے،غلام مصطفی

کوئٹہ(این این آئی)محکمہ پاپولیشن ویلفیئر اور یو این ایف پی اے کے رہنماوں نے کہا ہے کہ صوبے میں محکمہ سوشل ویلفیئر کے قائم 450سینٹرز میں خواتین کو فیملی پلاننگ کے بارے میں معلومات کی فراہمی،ادویات اوردیگر سامان فراہم کیا جارہا ہے فنڈز کی عدم دستیابی کے باعث بعض مسائل درپیش تھے اب فنڈز کی فراہمی سے ان مسائل پرقابو پانے میں مدد ملے گی۔یہ بات سابق ڈی جی محکمہ سوشل ویلفیئر غلام مصطفی،سوشل ویلفیئر کی ڈائریکٹر ٹیکنیکل ڈاکٹر امبرین مینگل،ایف پی اے پی کے مشتاق مینگل،ڈائریکٹر فنانس پاپولیشن ویلفیئر جمعہ خان کاکڑ، پاپولیشن ویلفیئر کے ڈائریکٹرپی ایم سی ٹی (پی ڈبلیو ڈی) عبدلستار شاہوانی،یو این ایف پی اے کی ڈاکٹر شمائلہ،ایم این سی ایچ کی ڈاکٹرثمینہ بگٹی،عبدالطیف محمد حسنی،داود بلوچ،ہما شیخ،محمد ایوب،ڈاکٹر مختار زہری،حبیبہ جمعہ،جہانزیب،عبداللہ شیرانی نے پیر کو محکمہ پاپولیشن ویلفیئر اور یو این ایف پی اے کے زیراہتمام ایف پی30 20کے مشاورتی گروپ کے اجلاس سے خطاب کرتے ہوئے کہی۔مقررین نے کہا کہ محکمہ سوشل ویلفیئر دیگر اسٹیک ہولڈز کے ساتھ ملکر صوبے میں فیملی پلاننگ کے منصوبوں پرعملدرآمدکر رہا ہے اس حوالے سے صوبے میں قائم 450سینٹرز میں خواتین کو فیملی پلاننگ کے بارے میں مفید معلومات فراہم کی جارہی ہیں۔ انہوں نے کہا کہ فنڈز کی عدم دستیابی کے باعث ہمیں جو ٹارگٹ دیا گیا تھا وہ پورا نہیں کرسکے اب پی پی ایچ آئی،محکمہ ہیلتھ،ایف پی اے پی،آئی ای سی،یواین ایف پی،ایم این سی ایچ اوردیگر ہیلتھ سے متعلق اداروں کو آن بورڈ لیا گیا ہے اورفنڈز کی فراہمی سے مسائل پر قابو پانے میں مدد ملے گی۔ انہوں نے کہا کہ صوبے میں فنڈز کی عدم دستیابی کے باعث فیملی پلاننگ سے متعلق ادویات اوردیگر سامان کی فراہمی میں مشکلات درپیش تھیں اب فیملی پلاننگ پرعملدرآمد کرنے والے جوڑوں کا مکمل ڈیٹا آن لائن دستیاب ہوگاجس کے بعد جو مشکلات درپیش آرہی تھیں انکے حل میں مدد ملے گی۔انہوں نے کہا کہ پہلے لوگوں کو فیملی پلاننگ سے متعلق معلومات نہیں تھیں اب شادی شادہ جوڑے فیملی پلاننگ پرعملدرآمد سے متعلق معلومات کیلئے محکمہ پاپولیشن ویلفیئر کے دفاتر سے رابطہ کر رہے ہیں جہاں انہیں ہرممکن سہولیات فراہم کی جارہی ہیں۔ انہوں نے کہا کہ ہمیں محکمہ پاپولیشن ویلفیئر کے فیملی پلاننگ سے متعلق دفاتر میں یوتھ کیلئے الگ سے ڈیسک قائم کرنے کی ضرورت ہے جہاں یوتھ کو فیملی پلاننگ سے متعلق مکمل آگاہی کی فراہمی کویقینی بنایا جاسکے۔