فلسطین میں اسرائیل کی جارحیت نہ صرف ظلم ہے بلکہ عالمی قوانین کی خلاف ورزی بھی ہے،مولانا مفتی محمد سعید

اوتھل (این این آئی) فلسطین میں اسرائیل کی جارحیت نہ صرف ظلم ہے بلکہ عالمی قوانین کی خلاف ورزی بھی ہے، جسے فوری طور پر روکا جانا چاہیئے ان خیالات کا اظہار اوتھل میں قائد جمعیت علمائے اسلام مولانا فضل الرحمن کے حکم پر صمود فلوٹیلا پر اسرائیلی جارحیت اور سابق امریکی صدر ٹرمپ کے 20 نکاتی امن منصوبے کے خلاف زبردست احتجاجی ریلی سے مقررین نے خطاب کرتے ہوئے کیا۔ریلی صدیق اکبر رض چوک لاکھڑا موڑ اوتھل سے شروع ہو کر قومی شاہراہ پر گشت کرتی ہوئی کراچی بس اسٹاپ مین بازار اوتھل میں ایک جلسے میں تبدیل ہو گئی۔ریلی کی قیادت جمعیت علماء اسلام تحصیل اوتھل کے امیر شیخ الحدیث مولانا مفتی محمد سعید، امام بخش شاہوک، مولانا مفتی محبوب علی آچرہ، اور وڈیرہ حسین جاموٹ نے کی۔ جلسے میں ہزاروں افراد نے شرکت کی اور اسرائیل کی فلسطینیوں پر سفاکانہ جارحیت کے خلاف شدید نعرے بازی کی گئی۔ مقررین میں مولانا مفتی محمد سعید، مولانا مفتی محبوب علی آچرہ، مولانا مفتی غلام اکبر گنگو، مولانا محمد سلیم چنا اور حافظ حسین احمد مدنی شامل تھے۔ انہوں نے کہا کہ فلسطین میں اسرائیل کی جارحیت نہ صرف ظلم ہے بلکہ عالمی قوانین کی خلاف ورزی بھی ہے، جسے فوری طور پر روکا جانا چاہیے۔ عالمی انسانی حقوق کی تنظیموں اور عالمی برادری سے مطالبہ کیا گیا کہ وہ اپنی ذمہ داریاں نبھائیں اور اسرائیلی وزیر اعظم نیتن یاہو کو عالمی عدالت انصاف کے حوالے کر کے سخت سزا دی جائے۔مقررین نے کہا کہ امریکہ کا 20 نکاتی امن منصوبہ حقیقت میں اسرائیل کی ناجائز تسلیم دہی کی کوشش ہے جسے امت مسلمہ اور پاکستانی عوام کبھی قبول نہیں کریں گے۔ انہوں نے فلسطینیوں کی بہادری کو سراہتے ہوئے کہا کہ صمود فلوٹیلا پر حملہ عالمی قوانین کی سنگین خلاف ورزی ہے اور اسے شدید مذمت کی جانی چاہیے۔ ریلی اور جلسے میں شریک عوام نے بھرپور طریقے سے اپنے احتجاج کا اظہار کیا اور اسرائیل اور اس کے حامیوں کے خلاف یکجہتی کا پیغام دیا۔ یہ احتجاج بلوچستان اور پورے پاکستان میں فلسطینی مسلمانوں کے ساتھ یکجہتی کا ثبوت ہے۔