سی اینڈ ڈبلیو میں سب انجینئرز کی بھرتی کو پبلک سروس کمیشن کے حوالے کرنا توہین عدالت کے زمرے میں آتا ہے، پاکستان ڈپلومہ انجینئر فیڈریشن

کوئٹہ(این این آئی)پاکستان ڈپلومہ انجینئر فیڈریشن بلوچستان کے صدر نورزمان کاکڑ، جنرل سیکرٹری حاجی ابراہیم زہری، حضرت علی اچکزئی،پریس سیکرٹری خالد جاوید اوردیگر نے اس امر پر حیرت کا اظہار کیا ہے کہ سی اینڈ ڈبلیو کی سب انجینئرز کی بھرتیوں میں کرپشن کا خاتمہ کرنے کی بجائے ان اسامیوں کو پبلک سروس کمیشن کے حوالے کردیا گیا کسی بھی بی 11کی آسامی کو پبلک سروس کمیشن کے حوالے کرنے کا یہ واحد اور انوکھا واقعہ ہے۔یہاں جاری ہونے والے ایک مشترکہ بیان میں انہوں نے کہا کہ پبلک سروس کمیشن نے اس میں ترمیم کرتے ہوئے ڈگری ہولڈرز کا کوٹہ مقرر کردیا جبکہ عدالت عالیہ کا اس بارے میں بالکل واضح فیصلہ ہے کہ سب انجینئر بی 11کی آسامی کیلئے صرف ڈپلومہ ہولڈرانجینئر ہی اہل ہیں۔انہوں نے کہا کہ حکومت اپنا واضح موقف جاری کرے کہ صوبائی محکموں میں سب انجینئر ز کی تعیناتی کون کریگا اور کون اس آسامی کا اہل ہے تاکہ سب انجینئرز کی بھرتی میں غیر معمولی تاخیر کو ختم کیا جاسکے بصورت دیگر فیڈریشن کی جانب سے متعلقہ افسران کے خلاف توہین عدالت کی درخواست دائر کی جائے گی جس کی تمام ترذمہ داری حکوت وقت پر ہوگی۔