گلستان میں نصف صدی پرانی قبائلی رنجش کا تاریخی تصفیہ ایک عظیم کامیابی اور امن و اتحاد کی جانب اہم پیشرفت ہے،پشتونخوانیشنل عوامی پارٹی

کوئٹہ (این این آئی)پشتونخوا نیشنل عوامی پارٹی کے صوبائی پریس ریلیز میں کہا گیا ہے کہ گزشتہ روز گلستان میں نصف صدی پرانی قبائلی رنجش کا تاریخی تصفیہ ایک عظیم کامیابی اور امن و اتحاد کی جانب اہم پیشرفت ہے۔ یہ صلح سید حاجی حنیف آغا اور سید نصرو آغا کے خاندانوں کے مابین عمل میں آئی، جسے علاقہ بھر میں نہایت خوش آئند قرار دیا جا رہا ہے۔ بیان میں کہا گیا کہ اس تاریخی صلح میں صالصین کی حیثیت سے قبائلی شخصیات احمد خان غبزئی، ملک شاجہان کاکڑ، اختر خان کاکڑ اور امیر جان آغا اور دیگر معتبرین نے مثالی کردار ادا کیا۔ جن کی انتھک کوششوں اور حکمت عملی سے دونوں خاندان ایک دوسرے کے گلے لگ گئے اور پرانی دشمنی کو ہمیشہ کے لیے دفن کر دیا گیا۔ بیان میں کہا کہ گلستان جیسے حساس علاقے میں نصف صدی پرانی قبائلی رنجش کا خاتمہ پشتون قوم کے لیے ایک روشن مثال ہے۔ جو آئندہ دیگر تنازعات کے خاتمے اور پائیدار امن کے قیام پر مثبت اثرات مرتب کرے گی۔ اس موقع پر گلستان میں منعقدہ عظیم الشان قبائلی جرگہ و ننواتی کے تقریب میں پشتونخوا نیشنل عوامی پارٹی کے مرکزی سینئر سیکرٹری سید قادر آغا، مرکزی سیکرٹری اطلاعات محمد عیسیٰ روشان، مرکزی سیکرٹری مالیات یوسف خان کاکڑ، صوبائی سیکرٹری اول فقیر خوشحال کاسی، مرکزی کمیٹی کے رکن سردار اصف خان سرگڑھ، صوبائی ڈپٹی سیکرٹریز ملک عبیداللہ کاکڑ، سید احسان آغا، عنایت خان اچکزئی، ڈاکٹر محمود سلیمان خیل، ضلعی سینئر معاون رمضان کاکڑ کے علاوہ پشتونخوا ایس او کے صبور خان کاکڑ، علما کرام، قبائلی معتبرین، پارٹی کارکنان اور ہزاروں کی تعداد میں عوام نے شرکت کی۔ بیان میں مزید کہا کہ پشتون افغان قوم ایک اعلیٰ روایات و اقدار غیرت، عزت اور مہمان نوازی سے بھرپور قوم ہے۔ بدقسمتی سے ماضی میں ان کے درمیان قبائلی رنجشیں اور دشمنیاں سازشوں کے ذریعے مسلط کی گئیں تاکہ پشتون قومی اتحاد کو کمزور کیا جا سکے۔ پارٹی نے کہا کہ اسطرح کے جرگے اور صلح کی روایات پشتون قوم کے استحکام اور امن کے فروغ کے لیے بنیاد فراہم کرتی ہیں، اور اس تاریخی مصالحت نے ثابت کیا کہ اگر پشتون آپس میں اتفاق کریں تو ہر رنجش کا خاتمہ ممکن ہے۔ بیان کے آخر میں پارٹی نے اس صلح میں کردار ادا کرنے والے تمام صالصین، قبائلی شخصیات اور عوام کا شکریہ ادا کرتے ہوئے امید ظاہر کی کہ ایسے اقدامات سے پورے پشتون وطن میں بھائی چارے امن اور یکجہتی کو فروغ ملے گی۔