بلوچستان پی ای سی کے دفاتر کو بند کرنے کی کسی صورت اجازت نہیں دیں گے،میر مجیب الرحمن مری

کوئٹہ(این این آئی)پاکستان انجینئرنگ کونسل بلوچستان کے رہنماوں نے کہا ہے کہ بلوچستان پی ای سی کے دفاتر کو بند کرنے کی کسی بھی صورت اجازت نہیں دیں گے اگر چیئرمین نے اپنا فیصلہ واپس نہیں لیاتو احتجاج کے دائرہ کار کو پورے ملک تک پھیلایا جائے گا۔ یہ بات پاکستان انجینئرنگ کونسل بلوچستان کے وائس چیئرمین میر مجیب الرحمن مری،شکیل بلوچ،انجینئرعثمان بابا، انجینئر نظام اچکزئی،انجینئر محبت مری، انجینئر نواز نوشیروانی اور انجینئر نعمان کاکڑ نے بدھ کو بلوچستان میں پی ای سی برانچز کی بندش کے خلاف پاکستان انجینئرنگ کونسل کے سمنگلی روڈ پر واقع دفتر کے باہراحتجاجی مظاہرے سے خطاب کرتے ہوئے کہی۔مقررین نے کہا کہ پاکستان انجینئرنگ کونسل کے چیئرمین کی ہدایت پر بلوچستان کے علاقے گوادر، تربت،خضدار اور لورالائی میں پاکستان انجینئرنگ کونسل کے دفاتر کو بند کیا جارہا ہے جو صوبے کے انجینئرز اور ٹھیکیداروں کے خلاف نا انصافی کے مترادف ہے۔انہوں نے کہا کہ بلوچستان کے دور دراز علاقوں میں قائم پی ای سی کے دفاتر کی بندش سے ٹھیکیداروں کو اپنی رجسٹریشن کیلئے سینکڑوں کلومیٹر کا فاصلہ طے کرکے کوئٹہ آنا پڑے گا جس سے انہیں مشکلات درپیش آئیں گی۔انہوں نے کہا کہ بلوچستان کے انجینئرز کی کاوشوں سے وسیم نذیر چیئرمین منتخب ہوئے لیکن انہوں نے آتے ہی بلوچستان کے انجینئرز کے ساتھ نا انصافی کا سلسلہ شروع کردیا جو کسی بھی صورت قابل قبول نہیں ہے۔انہوں نے کہاکہ پاکستان انجینئرنگ کونسل کے چیئرمین وسیم نذیر نے انجینئرز کیلئے انٹرن شپ پروگرام بھی بند کردیا ہے اس انٹرن شپ پروگرام کے تحت انجینئرز کو ماہانہ 30ہزار روپے الاونس کے ساتھ ساتھ مختلف محکموں میں ٹریننگ بھی کرائی جاتی تھی جواب بند ہوگئی ہے جو غریب اورپسماندہ صوبے کے انجینئرز کے ساتھ نا انصافی ہے ہمارا مطالبہ ہے کہ انٹرن شپ پروگرام کو فوری طور پر دوبارہ شروع کیا جائے۔انہوں نے کہا کہ وفاقی وزاء نوابزادہ خالد خان مگسی اور جام کمال خان کے ساتھ بھی اس معاملے کو اٹھایا ہے۔انہوں نے کہا کہ بلوچستان کے انجینئرز کسی بھی صورت صوبے کے مختلف علاقوں میں پاکستان انجینئرنگ کونسل کے دفاتر کو بند کرنے کی اجازت نہیں دیں گے اگرچیئرمین نے دفاتر بند کرنے کا فیصلہ واپس نہیں لیا تو انجینئرز بلوچستان سمیت ملک بھر میں سخت احتجاج پر مجبور ہونگے جس کی تمام ترزمہ داری پاکستان انجینئرنگ کونسل کے چیئرمین پر عائد ہوگی۔انہوں نے کہا کہ انجینئرز نے وزیراعلیٰ بلوچستان اور چیف سیکرٹری سے ملاقات کرکے بلوچستان کے انجینئرز کو دوسرے صوبوں کی طرح ٹیکنیکل الاونس دینے کا مطالبہ کیا ہے ہمیں امید ہے کہ بلوچستان کے انجینئرز کو بھی جلد ٹیکنیکل الاونس دیا جائے گا۔انجینئر محبت مری نے کہا کہ وسیم نذیر نے تین الیکشن لڑے کبھی کامیاب نہیں ہوا۔اس دفعہ ہم ینگ انجینئرز ایسوسی ایشن نے انکو ملک بھر سپورٹ کیا مگر انکو اپنی یہ کامیابی راس نہ آئی اور انجینئرز کے مسائل حل کرنے کی بجائے انجینئرز کیلئے مزید مشکلات پیدا کر رہا ہے۔