وفاقی محتسب اعلیٰ پاکستان کی فوری مداخلت

بیلا / خضدار(این این آئی)وفاقی محتسب اعلیٰ پاکستان کے علاقائی دفتر نے عوام الناس کو فوری، مفت اور دہلیز پر انصاف کی فراہمی کے سلسلے میں ایک اور نمایاں کامیابی حاصل کر لی ہے۔ بجلی کے صارفین کے مسائل اور کے الیکٹرک انتظامیہ کی جانب سے بھیجے گئے اضافی و ناواجب بلوں کے خلاف کارروائی کرتے ہوئے ایک باقاعدہ و باضمیر شہری کو بھاری مالی بوجھ سے نجات دلا دی گئی۔کیس کی تفصیلات کے مطابق اریگیشن کالونی بیلا کے رہائشی درخواست گزار عبد الکریم نے کے الیکٹرک کے خلاف وفاقی محتسب سے رجوع کیا تھا۔ سائل کا موقف تھا کہ وہ اپنے بجلی کے بل باقاعدگی سے ادا کرتے رہے ہیں، تاہم اس کے باوجود کے الیکٹرک انتظامیہ نے انہیں اچانک 74,809 روپے کا انتہائی سنگین اور بھاری ڈٹیکشن بل جاری کر دیا، جو کہ ان کے لیے ناقابلِ برداشت تھا۔ کے الیکٹرک سے ازالے کی امید نہ ملنے پر انہوں نے وفاقی محتسب کے ریجنل دفتر میں باضابطہ شکایت درج کرائی۔شکایت موصول ہوتے ہی وفاقی محتسب نے معاملے کا فوری نوٹس لیا اور کے الیکٹرک کے حکام کو جواب طلبی کے لیے طلب کیا۔ کیس کی سماعت اور ریکارڈ کی مکمل و شفاف ازسرِ نو جانچ پڑتال کے دوران یہ بات سامنے آئی کہ صارف پر زائد اور غیر منصفانہ بوجھ ڈالا گیا تھا۔ وفاقی محتسب کی سخت اور موثر ہدایات پر کے الیکٹرک انتظامیہ نے اپنی غلطی کا ازالہ کرتے ہوئے سائل کو 50,000 روپے کی بڑی رعایت (Waiver) فراہم کرنے کا باقاعدہ اعلان کیا۔اس اہم فیصلہ کے بعد سائل کے بل کی کل بقایا رقم 74,809 روپے سے کم ہو کر صرف 25,000 روپے رہ گئی۔ مزید براں، عام شہری کی مالی حیثیت کو مدنظر رکھتے ہوئے اور ان کی سہولت کے لیے وفاقی محتسب نے اس بقایا رقم کو 5 آسان ماہانہ اقساط میں ماہانہ بل کے ساتھ ادا کرنے کی منظوری بھی دلا دی۔وفاقی محتسب اعلیٰ کی جانب سے ملنے والے اس فوری انصاف، بڑی مالی رعایت اور اقساط کی سہولت پر درخواست گزار عبد الکریم نے شدید مسرت اور کامل اطمینان کا اظہار کرتے ہوئے وفاقی محتسب اعلیٰ اور ان کی ٹیم کا تہہ دل سے شکریہ ادا کیا۔ سائل کے مکمل اطمینان اور مسئلہ حل ہونے کے بعد کیس کو کامیابی سے داخلِ دفتر (Disposed of) کر دیا گیا۔وفاقی محتسب کا ادارہ تمام وفاقی اداروں بشمول کے الیکٹرک، کیسکو، نادرا اور دیگر محکموں کے خلاف عوامی شکایات کے سستے، فوری اور بلاتعطل ازالے کے لیے ہمہ وقت کوشاں ہے۔