قلعہ عبداللہ،قبائلی تصادم میں 6افراد کی ہلاکت قابل مذمت ہے،ارباب ناصر کاسی

کوئٹہ(این این آئی)چیئرمین پاکستان یوتھ پیس موومنٹ ارباب ناصرحیدرکاسی نے قلعہ عبداللہ کے علاقے میں قبائلی تصادم میں 6افراد کی ہلاکت کی مذمت کرتے ہوئے کہا ہے کہ قلعہ عبداللہ خان میں آئے روز فسادات مختلف قبائل دست و گریبان ہونا علاقے کے امن و امان اور وہاں کی نوجوان نسل کے لیے تباہی کا باعث بن رہا ہے۔یہاں جاری ہونے والے ایک بیان میں ارباب ناصر حیدر کاسی نے کہا کہ ارباب اختیار و ارباب اقتدار کو چاہئے کہ وہاں پر قانون کی بالادستی قائم کریں اور تمام سیاسی و سماجی قبائل مذہبی قوم پرست جماعتوں کا فرض بنتا ہے کہ وہ اس علاقے میں امن و اما ن کے قیام میں اپنا مثبت کردار ادا کریں۔انہوں نے کہا کہ بہت عرصے بعد ایک خوبصورت پیغام وہاں کے جوانوں میں آیا ہے کہ کھیل کا میدان ہو یا تعلیمی کے میدانوں میں اپنے علاقے شہر صوبہ و پورے ملک کا نام روشن کیا ہے خدارانئی نوجوان نسل کو اس برائی اور اس کلاشنکوف کلچر سے دور رکھیں۔انہوں نے کہا کہ اب نوجوان نسل اچھائی کی طرف قدم بڑھا چکی ہے اپنی مدد آپ کے تحت محنت مزدوری کرکے اپنے گھر اور اس وطن کی تعمیر و ترقی کا بہترین کام سر انجام دے رہی ہے علاقے میں تعلیم اور کھیل کے فروغ پر کوشش جاری تھی لیکن ایسے ناخوشگوار حالات واقعات نیک شگون نہیں ہیں۔ انہوں نے کہا کہ ہم قلعہ عبداللہ میں پیش آنے والے ناخوشگوار واقعہ کی مذمت کرتے ہیں جس میں 6قیمتی جانیں ضائع ہوئیں اور متعدد افرادزخمی ہوئے۔انہوں نے کہا کہ ارباب اختیار و اقتدار کو چاہئے کہ ایسے واقعات کی روک تھام کیلئے موثر اور عملی اقدامات اٹھائیں