بلوچستان میں چیف منسٹر یوتھ سکل ڈویلپمنٹ اینڈاوورسیز ایمپلائمنٹ پروگرام

کوئٹہ (این این آئی) بلوچستان میں چیف منسٹر یوتھ اسکل ڈویلپمنٹ اینڈاوورسیز ایمپلائمنٹ پروگرام کے تحت مقررہ ہدف 2375کے بجائے رواں سال جون تک پروگرام کے پہلے مرحلے میں صرف 150نوجوان ہی سعودی عرب جاسکے منصوبے کیلئے صوبائی حکومت نے ایک ارب 28کروڑ روپے کی ادائیگی کردی۔ محکمہ محنت وافرادی قوت کی رپورٹ کے مطابق بلوچستان ٹیکنکل ایجوکیشن اینڈ ووکیشنل ٹریننگ اتھارٹی کے زیر اہتمام چیف منسٹر یوتھ اسکل ڈویلپمنٹ اینڈاوورسیز ایمپلائمنٹ پروگرام کیپہلے مرحلے میں بلوچستان سے سعودی عرب،عمان،یو اے ای، یورپی یونین،جرمنی، رومانیہ کیلئے ہنرمند جوانوں کو ملازمت کیلئے بھجوا یا جارہا ہے۔ رپورٹ کے مطابق بلوچستان حکومت نے اس پروگرام کیلئے بی ٹیوٹا کو صوبائی حکومت نے ایک ارب 28کروڑ نوے لاکھ روپے جاری کئے ہیں جبکہ کنسلٹنٹ کمپنیوں کو 45کروڑ بیس لاکھ کی رقم کی ادائیگی کردی گئی ہے،بی ٹیوٹا نے اس سال جو ن تک 2375نوجوانوں کو بیرون ممالک بھجوا نے کا ٹارگٹ مقرر کیا تھا جس کیلئے 12839نوجوانوں نے درخواستیں جمع کرائیں جس کی فیس کی مد ایک کروڑ اٹھائیس لاکھ انتالیس ہزار روپے کی رقم جمع ہوئی ہے اس حوالے سے ایم ڈی بی ٹیوٹا طارق جاوید مینگل نے بتایا کہ چیف منسٹر یوتھ اسکل ڈویلپمنٹ اینڈاوورسیز ایمپلائمنٹ پروگرام کے تحت اب تک 150نوجوان سعودی عرب جاچکے ہیں،35نوجوانوں کا ایک گروپ 27جولائی کو ملازمت کیلئے بحرین جارہا ہے، رومانیہ اور پرتگال سے 82نوجوانوں کو جاب آفر لیٹرملنے والے ہیں جبکہ جرمنی میں ملازمت کیلئے 206نوجوانوں کوجرمن زبان سکھائی جارہی ہے۔