زائرین کے بائی روڈعراق جانے پر حکومت پاکستان کی جانب سے پابندی کا فیصلہ کسی بھی طرح قابل قبول نہیں ہے،طارق احمد جعفری

کوئٹہ(این این آئی)تحریک نفاذ فقہ جعفریہ بلوچستان کے ترجمان و لسان تحریک طارق احمد جعفری نے کہا ہے کہ زائرین کے بائی روڈعراق جانے پر حکومت پاکستان کی جانب سے پابندی کا فیصلہ کسی بھی طرح قابل قبول نہیں ہے، حکومت فوری طور پر اپنے فیصلے پر نظرثانی کرے۔یہ بات انہوں نے اتوار کو تحریک نفاذ فقہ جعفریہ اوراسکی ذیلی تنظیموں کے مشترکہ اجلاس سے خطاب کرتے ہوئے کہی۔انہوں نے کہا کہ حال ہی میں وفاقی وزیر داخلہ نے تہران میں ایران، عراق اور پاکستان کے درمیان سہ فریقی کانفرنس میں شرکت کے بعد بڑے بڑے دعوے کئے تھے کہ اس مرتبہ زائرین کیلئے ہرپہلو سے مکمل،مربوڑط اور جامع انتظامی پالیسی لائی جائے گی جس سے زائرین کو سہولیات میسر آئیں گی جس کے بعد زائرین کی ایک بڑی تعداد نے عراق کیلئے درخواستیں جمع کروائیں گروپ آرگنائزر زنے ویرہ، ہوٹل،ٹرانسپورٹ اور انشورنس سمیت دیگر انتظامات پر کام شروع کردیا اور درخواست جمع کرنے والوں نے ویزہ فیس بھی جمع کروادی ہے جس کے بعد ایران اورعراق کے ہوٹلوں میں زائرین کیلئے ایڈوانس بکنگ اور ٹرانسپورٹرز کو ادائیگیاں کی گئیں جس کی رقم کروڑوں روپے بنتی ہے۔ انہوں نے کہا کہ اب وزیرداخلہ اور حکومت پاکستان کا یہ کہنا کہ بائی روڈ عراق زیارت پر پابندی لگادی گئی ہے جوسمجھ سے بالاتر ہے۔انہوں نے کہا کہ ہم حکومت پاکستان اور وفاقی وزیرداخلہ سے اپیل کرتے ہیں کہ وہ فوری طور پر بائی روڈ زیارت پر جانے پر پابندی کے فیصلے کو واپس لیں تاکہ زائرین اپنے مذہبی فرائض کی ادائیگی کرسکیں