بلوچستان میں انسپکٹر جنرل پولیس کا عہدہ 26روز سے خالی

کوئٹہ(این این آئی) بلوچستان میں انسپکٹر جنرل پولیس کا عہدہ 26روز سے خالی، صوبے میں آئی جی پولیس نہ ہونے کے باعث اہم امور متاثر ہوگئے۔ تفصیلات کے مطابق سابق آئی جی پولیس بلوچستان معظم جاہ انصاری کی سرکاری ملازمت سے ریٹائرمنٹ کے بعد سے 4اگست سے آئی جی پولیس بلوچستان کا عہد ہ خالی ہے جس پر تاحال کوئی تعیناتی عمل میں نہیں لائی جا سکی، ذرائع کے مطابق بلوچستان کا آئی جی پولیس بننے سے بعض سینئر افسران معذرت کر چکے ہیں جبکہ ایک طویل فہرست میں سے کسی ایک افسر کے نام کو حتمی شکل نہیں دی جاسکی۔ آئی جی پولیس کی ریٹائرمنٹ کے بعد ایڈیشنل آئی جی سعید وزیر قائم مقام آئی جی تعینات ہیں تاہم بلوچستان میں بی ایریا کی اے ایریا میں تبدیلی سمیت دیگر اہم امور کل وقتی آئی جی کی تعیناتی نہ ہونے باعث متاثر ہورہے ہیں۔