عید میلادالنبی کی نسبت سے منعقد ہونے والی ریلیوں اور محافلِ میلاد میں ضلع پولیس کی جانب سے بھرپور سیکیورٹی فراہم کی جائے گی، محمد طیب اقبال

ڈیرہ مراد جمالی (این این آئی)ڈی آئی جی نصیرآباد رینج کیپٹن عاصم خان کے خصوصی احکامات و ایس ایس پی نصیرآباد غلام سرور بھیو کی ہدایات پر ایس ڈی پی او سرکل سٹی اے ایس پی محمد طیب اقبال کی زیر صدارت ایس ایس پی آفس نصیرآباد میں 12ربیع الاول کے حوالے سے امن کمیٹی اورسیرت میلاد کمیٹی کے ممبران و دیگر کے ہمراہ میٹنگ کا انعقاد کیا گیا۔ میٹنگ میں ایس ڈی پی او سرکل چھتر غلام حیدر منجھو، سیکیورٹی انچارج نصیرآباد انسپکٹر نور احمد ڈومکی، ایس ایچ او پولیس تھانہ سٹی انسپکٹر غلام علی کنڈرانی، ایس ایچ او پولیس تھانہ منجھو شوری سب انسپکٹر بہادر علی ڈومکی، اسپیشل برانچ اسٹاف اور متعلقہ ایس ایچ اوز سمیت امن کمیٹی اور میلاد کمیٹی کے ممبران نے شرکت کی۔ اے ایس پی محمد طیب اقبال نے میٹنگ میں شریک امن کمیٹی اور میلاد کمیٹی کے ممبران سے ماہ ربیع الاول کے دوران امن وامان اور محافلِ میلاد و جلوسوں کی سکیورٹی کے متعلق رہنماؤں سے تبادلہ خیال کیا اور اس ضمن میں رہنماؤں سے مسائل و تجاویز دریافت کی۔ اس موقع پر اے ایس پی محمد طیب اقبال کی جانب سے عید میلادالنبی کی نسبت سے منعقد ہونے والی ریلیوں اور محافلِ میلاد میں ضلع پولیس کی جانب سے بھرپور سیکیورٹی انتظامات کرنے کا عزم ظاہر کیا گیا، انہوں نے مزید کہا کہ ہمارے پیارے نبی آخر الزماں حضرت محمد مصطفیٰ کی آمد کی نسبت سے ماہِ ربیع الاوّل مسلم امہ کے لیے خوشیوں کا مہینہ ہے جس میں امن وامان بحال رکھنے کیلئے ضلع نصیرآباد پولیس کی جانب سے خصوصی سیکیورٹی پلان تشکیل دے کر سیکیورٹی کے سخت اقدامات کیے جائیں گے، دوسری جانب تمام شرکاء نے انتظامیہ سے تعاون کرنے کا عزم ظاہر کرتے ہوئے نصیرآباد پولیس کے اقدامات پر اعتماد کا اظہار کیا۔