لسبیلہ میں جشنِ عید میلاد النبی ﷺ عقیدت و احترام سے منایا گیا

لسبیلہ(رپورٹ بیوروچیف حفیظ دانش)ملک بھر کی طرح ضلع لسبیلہ کے ہیڈ کوارٹر اوتھل میں بھی جشنِ عید میلاد النبی ﷺنہایت عقیدت و احترام سے منایا گیا۔ 12 ربیع الاول کے موقع پر مرکزی جلوس درگاہ سید جمن شاہ سے برآمد ہوا جس کی قیادت معروف بزرگ ہستی سید عبدالحفیظ شاہ کاظمی اور ممتاز عالم دین علامہ قاضی شفیع محمد اویسی نے کی مرکزی جلوس اوتھل بازارقومی آرسی ڈی شاہراہ سے گزرتا ہوا واپس درگاہ سید جمن شاہ پر اختتام پذیر ہوا۔ اختتامی مقام پر پیرِ طریقت علامہ مولانا محمد جعفر شیخ نے ملک کی سلامتی، امت مسلمہ کے اتحاد، اور خیر و برکت کے لیے خصوصی دعائیں کیں۔جلوس میں ہزاروں عاشقانِ رسول ﷺ نے بھرپور شرکت کی، نعرہ تکبیر اور لبیک یا رسول اللہ ﷺ سے فضا گونج اُٹھا ایس ایس پی لسبیلہ عاطف امیر کی خصوصی ہدایت پر ڈی ایس پی حاصل خان قمبرانی کی نگرانی اور *ایس ایچ او جان محمد جاموٹ* کی موجودگی میں سیکیورٹی کے انتہائی سخت انتظامات کیے گئے تھے تاکہ جلوس پرامن طریقے سے اختتام پذیر ہو شہریوں اور جلوس کے منتظمین نے میونسپل کمیٹی اوتھل اور پولیس کی کاوشوں کو سرایا۔