اسلام خواتین کے حقوق کا سب سے بڑا علم بردار ہے،جاپانی قونصل جنرل سید ندیم شاہ

کوئٹہ(این این آئی)جاپان کے اعزازی قونصل جنرل برائے کوئٹہ بلوچستان سیدندیم شاہ اور ان کی اہلیہ خدیجہ ندیم سے کوئٹہ چلتن لائنز کلب کی صدر زینت یعقوب یوسفزئی اورکوئٹہ چلتن لائنز کلب کی سابق صدر نگہت شبیح نے ملاقات کی۔اس موقع پر جاپان کے اعزازی قونصل جنرل سیدندیم شاہ اور ان کی اہلیہ سابق صدر کوئٹہ چلتن لائنز کلب خدیجہ ندیم نے مسرور عالم کی اہلیہ پروفیسر آفتاب مسرورجو کئی کتابوں کی لکھاری تھیں کے انتقال پرتعزیت کی اور مرحومہ کی روح کے ایصال ثواب کیلئے دعائے مغفرت بھی کی گئی۔ کوئٹہ چلتن لائنز کلب کی صدر زینت یعقوب یوسفزئی نے کہا کہ کسی بھی ملک کی ترقی کا خواب تب تک شرمندہ تعبیر نہیں ہو سکتا جب تک خواتین کو تمام شعبہ زندگی میں مردوں کے شانہ بشانہ مواقع فراہم نہ دیئے جائیں،وفاقی اور صوبائی حکومتیں خواتین کو درآمدات، برآمدات کے شعبوں سمیت مرکزی دھارے میں لاکر ہی پاکستان ایک عظیم ملک بنا سکتے ہیں۔جاپان کے اعزازی قونصل جنرل سیدندیم شاہ کی اہلیہ خدیجہ ندیم نے کہا کہ اسلام خواتین کے حقوق کا سب سے بڑا علم بردار ہے اور خواتین کے حقوق کی ترغیب بھی دیتا ہے، اسلام خواتین کے شرعی دائرے میں رہتے ہوئے کام کرنے پر پابندی عائد نہیں کرتا،کسی بھی ملک کی معیشت کو مضبوط بنانے میں خواتین کا اہم کردار ہے لہٰذا شعبہ ہائے زندگی کے تمام سیکٹرز میں خواتین کے ساتھ تعاون اور ان کی تربیت کو یقینی بناکر ہی پاکستان کو عظیم ملک بنا یا جا سکتا ہے۔جاپان کے اعزازی قونصل جنرل سیدندیم عالم شاہ نے کہا کہ خواتین معاشرے کی معمار، گھروں کا ستون اور مستقبل کو سنوارنے میں اہم ترین کردار ادا کر تی ہیں، ہماری زندگیوں میں خواتین کا انتہائی اہم کردار ہے،کلاس رومز سے لے کر بورڈ رومز تک، میدانوں سے لے کر فرنٹ لائنز تک، خواتین قوم کے روشن مستقبل کو سنوار رہی ہیں۔