کوئٹہ (این این آئی)بلوچستان کے نئے تعینات انسپکٹر جنرل آف پولیس محمد طاہر نے آج سینٹرل پولیس آفس کوئٹہ میں اپنے عہدے کا باضابطہ چارج سنبھال لیا۔ اس موقع پر پولیس کے چاق و چوبند دستے نے انہیں سلامی پیش کی۔ جبکہ آئی جی پولیس نے پولیس شہداء کی یادگار پر حاضری دے کر پھول چڑھائے اور شہداء کے بلند درجات، ملکی یکجہتی و سلامتی کے لیے دعا کی۔عہدہ سنبھالنے کے بعد آئی جی پولیس بلوچستان محمد طاہر نے سینئر پولیس افسران کے ساتھ تعارفی اجلاس کی صدارت کی جس میں صوبے کی امن و امان کی صورتحال اور پولیس کی کارکردگی پر تفصیلی تبادلہ خیال کیا گیا۔ اپنے خطاب میں انہوں نے کہا کہ بلوچستان پولیس ایک باصلاحیت، دلیر اور قربانیوں سے سرشار فورس ہے، جس نے دہشت گردی کے خلاف بے مثال قربانیاں دیں اور دنیا اس کی بہادری کی معترف ہے۔انہوں نے واضح کیا کہ پولیس اہلکاروں کی فلاح و بہبود ان کی اولین ترجیحات میں شامل ہے، کیونکہ دہشت گردی کے خلاف جنگ میں اس فورس نے گراں قدر جانی و مالی قربانیاں دی ہیں۔ انہوں نے عزم ظاہر کیا کہ جوانوں کی فلاح کے لیے تمام دستیاب وسائل بروئے کار لائے جائیں گے اور مزید سہولیات کے حصول کے لیے حکومت سے بھی رابطہ کیا جائے گا۔آئی جی پولیس بلوچستان محمد طاہر نے کہا کہ عوام اور پولیس کے درمیان اعتماد کا فروغ ناگزیر ہے تاکہ شہریوں کے جان و مال کا تحفظ اور بنیادی حقوق کی پاسداری یقینی بنائی جا سکے۔ انہوں نے اپنی تعیناتی کو قومی خدمت کا اعزاز قرار دیتے ہوئے کہا کہ بلوچستان پولیس کو ناقابلِ تسخیر بنانے کے لیے خلوص نیت، پیشہ ورانہ جذبے اور سخت محنت کو اپنانا ہوگا۔یاد رہے کہ محمد طاہر اس سے قبل ایڈیشنل آئی جی پولیس خیبر پختونخوا کے طور پر خدمات انجام دے چکے ہیں اور پولیس کے شعبے میں وسیع تجربہ رکھتے ہیں۔
بلوچستان پولیس باصلاحیت، دلیر اور قربانیوں سے سرشار فورس ہے،دہشت گردی کیخلاف بے مثال قربانیاں دیں،آئی جی محمد طاہر
