طے شدہ ایس او پیز کی پابندی کی جائیگی،،مظاہرین مختص جگہ سے باہر نہیں جائیں گے، سیاسی جماعتوں،ڈپٹی کمشنر کوئٹہ میں اتفاق

کوئٹہ(این این آئی) ڈپٹی کمشنر کوئٹہ مہراللہ بادینی کی زیر صدارت آج منعقد ہونے والے احتجاج کے حوالے سے سیاسی جماعتوں کے نمائندوں کے ساتھ اہم اجلاس منعقد ہوا۔ اجلاس میں ایس ایس پی آپریشن محمد بلوچ، ایڈیشنل ڈپٹی کمشنر (جنرل) محمد انور کاکڑ، اسسٹنٹ کمشنر (صدر) کیپٹن (ر) حمزہ انجم سمیت ضلعی انتظامیہ کے دیگر افسران شریک ہوئے۔سیاسی جماعتوں کی جانب سے پشتونخوا ملی عوامی پارٹی کے کبیر افغان، عوامی نیشنل پارٹی کے سردار رشید ناصر، بی این پی کے غلام نبی مری و عبیداللہ عابد، اور نیشنل پارٹی کے چیئرمین اسلم بلوچ سمیت دیگر رہنماؤں نے شرکت کی۔اجلاس میں کل کے احتجاج کے حوالے سے تفصیلی بات چیت کی گئی اور فیصلہ کیا گیا کہ تمام سیاسی جماعتیں ضلعی انتظامیہ اور پولیس کے ساتھ مکمل تعاون کریں گی۔ طے شدہ ایس او پیز کی پابندی کی جائے گی، زیادہ رش نہیں بنایا جائے گا اور مظاہرین مختص جگہ سے باہر نہیں جائیں گے۔اجلاس میں یہ بھی فیصلہ کیا گیا کہ کسی بھی قسم کی خلاف ورزی کی صورت میں ضلعی انتظامیہ قانون کے مطابق کارروائی کرے گی۔