کھیلوں کی بنیاد سکول و کالج کے بچے،نیا ٹیلنٹ سامنے لانے کیلئے گراس روٹ لیول کام کر رہے ہیں،سیکرٹری کھیل درا بلوچ

کوئٹہ (این این آئی) سیکرٹری برائے کھیل و امور نوجوانان بلوچستان درا بلوچ نے کہا ہے کہ کھیلوں کو ترقی دینے کے لیے نوجوانوں کو میدانوں کی طرف راغب کرنا ضروری ہے کھیلوں کی ترقی کی بنیاد اسکول اور کالج کے بچے ہیں۔ جلد ان کے لیے انٹر سکولز انٹر کالجز اور انٹر یونیورسٹیز ٹورنامنٹ منعقد کیے جائیں گے۔ ان خیالات کا اظہار انہوں نے سریاب روڈ بوائز انٹر کالج کے دورے کے موقع پر بات چیت کرتے ہوئے کہی انہوں نے کہاکہ بچے بچیوں میں ٹیلنٹ کی کوئی کمی نہیں ان کو مواقع فراہم کر رہے ہیں تاکہ نیا ٹیلنٹ سامنے ائے۔ اسی لیے ہم گراس روٹ لیول پر کام کر رہے ہیں۔صوبے کے مختلف کالجز واسکول اور یونیورسٹیز میں موجود کھیلوں کے میدانوں پر ترقیاتی منصوبے جاری ہیں جن سے وہاں موجود بچوں کو نصابی سرگرمیوں کے ساتھ کھیلوں کی سرگرمیوں میں بڑھ چڑھ کر حصہ لینے کے مواقع بھی ملیں گے۔ صوبے بھر میں پورے سال کھیلوں کے مقابلے منعقد کیے جائیں گے جن میں نیا ٹیلنٹ کو سامنے لانے کی بھرپور کوشش ہے تاکہ اگے جا کر یہ اپنے صوبے اور ملک کا نام روشن کر سکیں۔