پی سی بی اور بیکن ہاؤس کے درمیان کرکٹرز کے لیے تعلیمی سکالرشپ کا معاہدہ طے پا گیا

لاہور(این این آئی)پاکستان کرکٹ بورڈ اور بیکن ہاؤس کے درمیان کرکٹرز کے لیے تعلیمی سکالرشپ کا معاہدہ طے پا گیا۔پی سی بی ہیڈ کوارٹر میں معاہدے پر دستخط کی پروقار تقریب منعقد ہوئی۔چیئرمین پی سی بی محسن نقوی معاہدے پر دستخط کی تقریب کے مہمان خصوصی تھے۔ پی سی بی کے چیف آپریٹنگ آفیسر سمیر احمد اور بیکن ہاؤس کے چیف ایگزیکٹو قاسم قصوری نے معاہدے پر دستخط کئے۔ معاہدے کے تحت ملک کے 16 ریجنز سے تعلق رکھنے والے انڈر 15، انڈر 17 اور انڈر 19 کیٹیگریز کے 120 نمایاں کھلاڑیوں کو مفت تعلیم دی جائے گی۔نوجوان کرکٹرز کے لئے تعلیمی وظائف کا معاہدہ 3 برس تک نافذ العمل رہے گا۔چیئرمین پی سی بی محسن نقوی نے نوجوان کھلاڑیوں کے لیے تعلیمی معاونت پر بیکن ہا ؤس کے اقدام کو سراہتے ہوئے کہا کہ اس معاہدے سے نوجوان کرکٹرز کھیل کے ساتھ تعلیم پر بھی پوری توجہ دے سکیں گے،نوجوان کرکٹرز کے تعلیمی وظائف کا معاہدہ دورس نتائج کا حامل ہو گا۔ محسن نقوی نے کہا کہ بیکن ہاؤس سے شراکت داری سے مستقبل کے کرکٹ سٹارز کی تعلیمی ضروریات کو پورا کیا جا سکے گا،تعلیمی سکالرشپ کا دائرہ کار کو مزید وسعت دی جائے گی تاکہ زیادہ سے زیادہ کرکٹ سٹارز اس سے فائدہ اٹھا سکیں،بلاشبہ یہ شراکت داری نوجوان کرکٹرز کے اچھے مستقبل کی ضمانت ہے۔ معاہدے پر دستخط کی تقریب میں پاکستان وائٹ بال ٹیم کے ہیڈ کوچ مائیک ہیسن، ڈائریکٹر ڈومیسٹک کرکٹ عبداللہ خرم نیازی، اور جی ایم ڈومیسٹک جنید ضیا ء، بیکن ہاؤس کے چیف آپریٹنگ آفیسر علی احمد خان، اے ڈی آپریشنز فیصل نثار، جنرل منیجر سیدہ ارم نقوی اور منیجر سپورٹس تانیا ملک سمیت دیگر شریک ہوئے۔