مستونگ،کردگاپ سے اغوا ہونے والے پولیس افسر کو قتل کردیا گیا

مستونگ(این این آئی) مستونگ کے علاقے کردگاپ سے اغوا ہونے والے پولیس افسر کو قتل کردیا گیا۔تفصیلات کے مطابق مستونگ سے چند روز پہلے اغوا ہونے والے ایس ڈی پی او نوشکی محمد یوسف ریکی کی لاش جمعرات کو مستونگ کے علاقے کردگاپ میں گرگینہ کلی شربت خان سے برآمد ہوئی ہے۔ ایس ایچ او کردگاپ تھانہ غلام سرور نے بتایا کہ مقتول کو سر اور جسم کے مختلف حصوں میں گولیاں ماری گئی ہیں۔انہوں نے مزید بتایا کہ لاش کو قانونی کارروائی کے لیے کوئٹہ منتقل کیا کردیاگیا۔ پولیس حکام کے مطابق مقتول ڈی ایس پی محمد یوسف ریکی نوشکی میں بطور سب ڈویژنل پولیس افسر (ایس ڈی پی او) تعینات تھے۔ انہیں پانچ روز قبل ہفتہ اور اتوار کی درمیانی شب نوشکی سے براستہ مستونگ سوراب اپنے گھر جاتے ہوئے مستونگ کے علاقے کردگاپ کے قریب نامعلوم مسلح افراد نے گاڑی سمیت اغوا کرلیا تھا۔پولیس کے مطابق اغوا سے چند لمحے قبل محمد یوسف ریکی نے اپنی اہلیہ کو فون کرکے بتایا تھا کہ انہیں مسلح افراد نے روک لیا ہے۔ اس کے بعد ان سے رابطہ منقطع ہوگیا۔ابتدائی تحقیقات کے مطابق وہ کسی محافظ کے بغیر اکیلئے نیشنل ہائی وے کی بجائے نسبتاً غیر آباد اور پہاڑی مگر مختصر راستے سے سفر کر رہے تھے۔ ان کی گاڑی تاحال نہیں ملی۔پولیس حکام کا کہنا ہے کہ اغوا اور قتل کی وجوہات فی الحال معلوم نہیں ہوسکیں۔