قلات ڈویژن سپورٹس فیسٹیول، طالبات کی بھرپور شرکت، فائنل گورنمنٹ گرلز ہائر سیکنڈری سکول حب نے جیت لیا

کوئٹہ (این این آئی)محکمہ کھیل حکومت بلوچستان کے زیراہتمام حب چوکی میں قلات ڈویژن سپورٹس فیسٹیول میں لڑکیوں کے مابین کرکٹ ٹورنامنٹ گورنمنٹ بوائز ہائی سکول کے کرکٹ گراؤنڈ میں منعقد ہوا، جس میں حب ڈسٹرکٹ سے پانچ سکولوں کی ٹیموں نے حصہ لیا، ٹورنامنٹ میں ٹیموں کے درمیان سنسنی خیز مقابلے ہوئے طالبات نے بیٹنگ، بولنگ اور فیلڈنگ کے شعبوں میں بہترین صلاحیتوں کا مظاہرہ کیا۔ آخر میں فائنل میچ گورنمنٹ گرلز ہائر سیکنڈری سکول حب اور گورنمنٹ گرلز ہائی سکول ساکران کے درمیان کھیلا گیا جس میں گورنمنٹ گرلز ہائر سیکنڈری اسکول حب کی ٹیم نے شاندار کارکردگی دکھاتے ہوئے ٹائٹل اپنے نام کیا۔ قبل ازیں ٹورنامنٹ کا باقاعدہ افتتاح مہمان خصوصی ڈی ای او فیمیل نسرین اقبال نے بلے سے شارٹ لگا کر کیا۔اس موقع پر ڈپٹی ڈائریکٹر سپورٹس آصف فاروقی، سپورٹس آفیسر حب عادل بلوچ، چیف سپورٹس فیسٹیول آرگنائزر رحیم بخش میروانی، سپورٹس آرگنائزر محسن جمال، ڈی ای او حب محمد رحیم بلیدی، نازش عطاء، فوزیہ، شیرین، نسرین شیخ و دیگر اساتذہ سمیت مختلف سکولوں سے آئیں طالبات کی کثیر تعداد موجود تھی۔مہمانان نے جیتنے والی ٹیم کو مبارکباد پیش کی اور کہا کہ بلوچستان کی طالبات کھیلوں کے میدان میں بھی اپنی صلاحیتوں کو اجاگر کر رہی ہیں۔محکمہ کھیل حکومت بلوچستان صوبے بھر میں خواتین کے کھیلوں کے فروغ کے لیے اقدامات جاری رکھے ہوئے ہے تاکہ نوجوان طالبات کو اپنی صلاحیتیں اجاگر کرنے کے بھرپور مواقع فراہم کیے جا سکیں، کل بھی لڑکیوں کے مابین مختلف کھیلوں کے مقابلے منعقد ہونگے جن کے اختتام پر کامیاب ٹیموں کو انعامات دیئے جائیں گے۔