نوجوان نسل کو معیاری تعلیم،بہتر سہولیات فراہمی کیلئے حکومت اصلاحات پر سنجیدگی سے کام کر رہی ہے، وزیر تعلیم راحیلہ حمید درانی

کوئٹہ(این این آئی) وزیر تعلیم بلوچستان راحیلہ حمید درانی نے کہا ہے کہ صوبائی حکومت تعلیمی اصلاحات پر سنجیدگی سے کام کر رہی ہے تاکہ نوجوان نسل کو معیاری تعلیم اور بہتر سہولیات فراہم کی جاسکیں،حکومت نے 3ہزارکے قریب غیر فعال اسکولوں کو فعال کرکے وہاں اساتذہ کی تعیناتی کو یقینی بنایا ہے۔یہ بات انہون نے مسلم لیگ (ن) یوتھ ونگ کے صوبائی سیکرٹری جنرل میرسجاد رئیسانی کی قیادت میں ملاقات کرنے والے وفد سے بات چیت کرتے ہوئے کہی۔وفد میں پاکستان مسلم لیگ (ن) یوتھ ونگ کے سینئر نائب صدور میر عین الدین کرد، عرفان بلوچ، صوبائی جوائنٹ سیکریٹری عزیز مری، مکران ڈویژن کے صدر زبیر زامرانی ڈسٹرکٹ کوئٹہ کے صدر میر ریاض گرگناڑی، آغا مشتاق تارن، اشرف کرد، عارف محمد شہی، شکیل بلوچ شامل تھے۔ ملاقات کے دوران نوجوانوں کو درپیش مسائل، تعلیم کے شعبے میں بہتری اور نوجوانوں کی فلاح و بہبود کے لیے حکومتی اقدامات پر تفصیلی تبادلہ خیال کیا گیا۔صوبائی وزیر تعلیم راحیلہ حمید درانی نے وفد سے گفتگو کرتے ہوئے کہا کہ نوجوان ملک کا مستقبل ہیں اور ان کے مسائل کا حل حکومت کی اولین ترجیح ہے۔ انہوں نے کہا کہ تعلیم، تربیتاور روزگار کے مواقع فراہم کر کے ہی نوجوانوں کو قومی ترقی کے دھارے میں شامل کیا جا سکتا ہے۔انہوں نے کہا کہ صوبائی حکومت تعلیمی اصلاحات پر سنجیدگی سے کام کر رہی ہے تاکہ نوجوان نسل کو معیاری تعلیم اور بہتر سہولیات فراہم کی جاسکیں۔ انہوں نے یوتھ ونگ کے نمائندوں کو یقین دہانی کرائی کہ ان کی دی گئی تجاویز پر غور کیا جائے گا اور نوجوانوں کے لیے مزید موثر پالیسیز بنانے میں ان کی آرا شامل کی جائیں گی۔وفد نے صوبائی وزیر تعلیم کو اپنے مکمل تعاون کی یقین دہانی کراتے ہوئے کہا کہ وہ نوجوانوں کے مسائل اجاگر کرنے اور ان کے حل میں بھرپور کردار ادا کرتے رہیں گے۔